جاڭالىقتار

تالعات كولباەۆ ۆەلوسپورتقا قالاي كەلدى?

ءار ادامنىڭ تاعدىرى – ءبىر-ءبىر كىتاپ. بىرەۋلەردىڭ تاعدىرى قايعى تۇڭعيىعىنا باتىرىپ, ايانىش تۋدىرسا, ەكىنشى ءبىر ادامداردىڭ ءومىر جولى جەڭىستەرىمەن جىگەرلەندىرەدى. قۇلشىنىس بەرەدى. تاڭقالدىرادى. سونداي قايسار ادامداردىڭ ءبىرى – اقمولا وبلىسىنىڭ تۋماسى تالعات قايىركەن ۇلى كولباەۆ.

بۇل ەسىمدى ەلگە تانىستىرىپ جاتۋ ارتىق بولار. سوندا دا, از كەم-توقتالا كەتسەك, قازاقستان رەسپۋبليكاسىنىڭ ۆەلوسپورت بويىنشا ەڭبەك سىڭىرگەن جاتتىقتىرۋشىسى. سپورتتىڭ وسى تۇرىندەگى ەڭ داڭقتى كوماندا Astana Qazaqstan Team ۆەلوكومانداسىنىڭ مەنەدجەرى.
كەيىپكەرىمىزدىڭ سپورتقا كەلۋ تاريحى دا قىزىق. ادەتتە, ادامدار «كىم بولامىن?» دەگەن سۇراققا بالا كۇنىندە جاۋاپ تاۋىپ ۇلگەرەدى. ءبىر كەزدەيسوق نارسەگە اۋەسى اۋىپ, كەيىنگى بۇكىل ءومىر جولىن انىقتايدى. ءوزىنىڭ ايتۋىنشا, تالعات كولباەۆ تا ۆەلوسپورتقا وسىلاي كەلگەن.
«1980 جىلدارى بۇكىل ەلدىڭ نازارى وليمپيادا ويىندارىنا اۋعان بولاتىن. بۇل – بۇكىل سول كەزدەگى ەڭ ءىرى وقيعا بولعان ەدى. كورگەندەرىمنىڭ ىشىندە, ەسىمدە قالعانى, قاتتى اسەر قالدىرعانى ۆەلوسپورت بولدى. نەگە ەكەنىن ءوزىم دە بىلمەدىم», – دەيدى باپكەر.

قاراسا, دوستارى مەن اۋلاداعى كورشى بالالار جاپپاي ۆەلوسپورتپەن شۇعىلدانا باستاپتى. بۋرابايدا سپورتتىق ۆەلوسيپەدپەن ءوزارا جارىسىپ جۇيىتكىپ جۇرگەن. بۇعان قىزىققانى سونشالىقتى, ەرتەڭىنە بارىپ, ۆەلوسپورت ۇيىرمەسىنە جازىلادى.

«وتكەن ومىرىمە كوز جۇگىرتە وتىرىپ, ۆەلوسپورتتى باسقا سپورت تۇرىنە ايىرباستامايتىنىمدى ءتۇسىندىم. باستاپقى كەزدە ەكى مارتە تاستاپ كەتۋگە شاق قالعان كەزدەرىم دە بار», – دەپ جاستىق شاعىن ەسىنە تۇسىرەدى تالعات كولباەۆ.

ءبىرىنشى سەبەبى – ون جاسار بالا ءۇشىن ۆەلوسيپەد تىم ۇلكەن ەدى ول كەزدە ۆەلوسيپەدتىڭ كەرەك بولشەكتەرى مەن قۇرالدارىن تابۋ اسا قيىن ەدى. جاسىرانتىنى جوق, كەيدە اتا-اناسىنىڭ دا قولى قىسقالىق ەتكەن. بىراق جاتتىقتىرۋشىسى دا ءوز ىسىنە بەرىلگەن ادام بولىپ شىعىپتى. كىشكەنتاي بالا تالعات ءۇشىن ۆەلوسيپەدىن بۇزىپ, كولەمىن كىشىرەيتىپ, شاقتاپ قايتا جاساپ بەرەدى.
ەكىنشىسىندە, جاس بالانىڭ سپورتپەن تىم اۋەستەنىپ كەتكەنى اكەسىنە ۇناماپتى. «قاتتى جاراقات الىپ قالا ما?» دەپ سەكەمدەنىپ, «ۆەلوسپورتتى تاستا» دەپ بۇيىرعان. تىيىم دا سالعان. بىراق اراعا ءبىر جىل سالىپ, تالعات شايتان ارباعا قايتا وتىرادى. اكەسى بۇل جولى «قوي» دەپ ايتۋدان ەشتەڭە شىقپاسىن تۇسىنگەن.
تىنباي, ۇزدىكسىز جاتتىعۋ, ەڭبەكتەنۋ – قاشاندا ۇلكەن جەتىستىكتىڭ باستاۋى. سونىڭ ارقاسىندا 1987 جىلى تالعات كولباەۆ كسرو قۇراماسىنا الىنادى. جاستار اراسىندا چەمپيوناتتارعا قاتىسادى. ايتا كەتۋ كەرەك, 1989-1990 جىلدارى كسرو قۇراماسىندا ەكى بىردەي الەم چەمپيوناتىندا ويىن كورسەتەدى.

«جۇلدە الماساق تا, بۇل چەمپيوناتتار مەن ءۇشىن وراسان زور تاجىريبە بولدى. سول سەبەپتى دە, 1990 جىلى ءۇش تۋر ناتيجەسىندە تاۋ چەمپيوناتىندا ەرەسەكتەر اراسىندا كسرو چەمپيونى بولدىم», – دەيدى تاكەڭ.

ارينە, جەڭىس وڭاي كەلمەيدى. ءومىردىڭ بۇرالاڭ سوقپاعى تاعى بار. جەڭىس پەن جەڭىلىس قاتار جولىعىپ, يتجىعىس ءتۇسىپ جاتادى. سپورت سونىسىمەن دە قىزىق. سپورتشى ترەنەر شتابىمەن سوزگە كەلىپ, سپورتتىق ءمانسابىن تاستاپ كەتپەك تە بولعان. بۇل 1990 جىل ەدى. بىراق اكەسىنىڭ اقىلى كۇش بەرىپ, جىگەر قوسىپ, دۇرىس جولدى تاڭداۋعا سەبەپ بولىپتى.

«ۆەلوسپورتتى مەن تاڭداعانىم جوق, مەنى ۆەلوسپورت تاڭدادى. مۇنى سان مارتە ايتىپ تا كەلەمىن. العاشقى ترەنەرىمە, ماعان سەنىم ارتقانى ءۇشىن اكەمە رازىمىن. وسى ەكى ادامنىڭ ارقاسىندا ۇلكەن سپورتقا ومىرلىك جولداما الدىم», – دەيدى قر ەڭبەك سىڭىرگەن ترەنەرى.

سپورتتىڭ بۇلجىماس ءوز قاعيداسى بار. اقىل توقتاتىپ, كەمەل شاققا جەتكەندە قوش ايتىسۋعا تۋرا كەلەدى. تالعات كولباەۆ تا سپورتتىق ءمانسابىن اياقتاپ, وتباسى – وشاق قاسىنان تابىلىپ, باسقا سالاعا اۋىسادى. بىراق ءومىر جولى – ۆەلوسپورتتان قول ۇزبەۋگە بەل بۋىپ, 2007 جىلى جاتتىقتىرۋشى رەتىندە جاستاردى باۋلۋدى ۇيعارادى. 2012 جىلى شاكىرتى الەكسەي لۋتسەنكو الەم چەمپيونى اتانادى. باپكەر ءۇشىن بۇدان ارتىق نە باقىت بار!

«داڭقتى ۆەلوشاباندوز لەنس ارمسترونگتىڭ: «ۆەلوسيپەد تەپكەندە مەنى جارىس رەكوردتارى ەمەس, باقىتتى باستان وتكەرۋ جەلىكتىرەدى», – دەگەن ادەمى ءبىر ءسوزى بار. ۆەلوسپورت – ءومىر ءسۇرۋ سالتى. باسقا سپورتتاردان وزگەشەلىگى, مۇندا شەكتەۋ جوق. كەز كەلگەن جاستا كاسىبي تۇردە دە, ءوز دەنساۋلىعىڭ ءۇشىن دە اينالىسا بەرۋگە بولادى. باستىسى, بۇل سپورت بۋىن اۋرىنا وتە پايدالى. تىزەسى اۋىراتىن ادامدار ءۇشىن دە, ارتىق سالماعى بارلار مەن جاسى كەلگەن ادامدار ءۇشىن دە پايداسى زور», – دەيدى تالعات كولباەۆ.

ونىڭ پىكىرىنشە, ۆەلوسپورت پەن ۆەلوتۋريزم بۇكىل الەمدە دامىپ كەلەدى. ويتكەنى, ۆەلوسيپەدتى كۇندەلىكتى ومىردە قولدانۋ وڭاي ءارى ىڭعايلى. ەكولوگيالىق جاعىنان تازا ءارى دەنەنىڭ قالپىن بۇزباي ۇستاپ تۇرادى. ەۋروپا ەلدەرىندە حالىقتىڭ ۇشتەن ەكىسى دۇكەنگە, اپتەكاعا بارۋ سەكىلدى كۇيبەڭ تىرشىلىك ءۇشىن ۇنەمى ۆەلوسيپەدكە جۇگىنەدى. وقۋىنا, جۇمىسىنا حالىقتىڭ 40 پايىزى وسى كولىكپەن بارادى ەكەن. سوندىقتان ەۋروپادا ۆەلوسپورت – فۋتبولدان كەيىنگى ەكىنشى تانىمال سپورت.

ءبىزدىڭ ەلىمىزدە ۆەلوسپورتتى جۇرت سپورتتىڭ جاڭا قانات جايىپ كەلە اتقان ءتۇرى رەتىندە قابىلدايدى. بىراق, ماماننىڭ ايتۋىنشا, تامىرى تەرەڭدە. سوناۋ 1914 جىلى العاشقى تۋرنير ءوتىپتى. دەمەك, ۆەلوسيپەد سپورتىنىڭ تاريحى 107 جىل بۇرىن باستالىپتى. مۇنى بىرەۋ بىلسە, بىرەۋ بىلە بەرمەيدى.

ۆەلوسپورت تانىمالدىق جاعىنان فۋتبول مەن حوككەيدەن كەيىن ءۇشىنشى ورىندى يەمدەنىپ وتىر. 2012 جىلى لوندوندا وتكەن وليمپيادادا الەكساندر ۆينوكۋروۆ جەڭىسكە جەتكەننەن كەيىن ەل اراسىندا كەڭىنەن تانىلدى. چەمپيوناتتاردى قالت جىبەرمەي تاماشالاپ, قازاقستاننىڭ سپورتشىلارى جەڭەدى دەپ ءباس تىگە دە باستادى.

«ءبىزدىڭ ۆەلوشاباندوزدارىمىز جەرگىلىكتى جانە الەمدىك بىرىنشىلىكتەردە كەرەمەت ناتيجە كورسەتىپ ءجۇر. سونىڭ ارقاسىندا ەلىمىزدە جىل سايىن ۆەلوسپورتقا دەگەن قىزىعۋشىلىق ارتىپ كەلەدى. سوڭعى جىلدارى جان-جاقتى دامىپ جاتىر. جىل سايىن جاڭا جولدار پايدا بولۋدا. شۇعىلدانامىن دەۋشىلەردىڭ دە قاراسى كوبەيىپ وتىر», – دەيدى تالعات كولباەۆ.

ارينە, ەلىمىزدە جاستاردىڭ ۆەلوسپورتقا قۇمارتۋىنا Astana Qazaqstan Team-ءنىڭ قوسقان ۇلەسى مول. قازاقستاندىق كوماندانىڭ جەتىستىكتەرى قالىڭ كوپشىلىكتىڭ بۇل سپورت تۇرىنە نازارىن ەرىكسىز اۋدارتىپ, جاڭكۇيەرلەرىنىڭ دە سانى ارتىپ كەلەدى.

قازىرگى زاماندا وتباسى قامى, جۇمىس جانە دەمالىستى تەڭ ۇستاپ, بۇعان ۋاقىت تابا ءبىلۋ قيىن. ەڭبەك سىڭىرگەن ترەنەر سپورتتىڭ, سونىڭ ىشىندە ۆەلوسپورتتىڭ قوبالجۋ مەن كۇيزەلىسكە ءتۇسۋدىڭ الدىن الىپ, ءتان مەن جاننىڭ ساۋلىعىن ساقتاۋدىڭ تاپتىرماس قۇرالى ەكەنىن ايتادى.

«ءبارىڭىزدى ۆەلوسپورتتى تاڭداۋعا شاقىرامىن. ۆەلوسپورتتا ءسىزدىڭ قانشا اقشاڭىز بار ەكەنى ماڭىزدى ەمەس. كىم ارەكەت جاساپ, تاباندىلىق كورسەتسە, كۇرەسە بىلسە, سول جەڭىسكە جەتەدى», – دەيدى تالعات كولباەۆ.

«استانا» كاسىبي سپورت كلۋبىنىڭ باس سەرىكتەسى – «سامۇرىق-قازىنا» ۇاق» اق, قۇرىلتايشىسى – تۋريزم يندۋسترياسى مەن سپورتتى قولداۋ قورى

وسى ايداردا

پىكىر ۇستەۋ

Close