Кемел Тоқаевтың есімі Бішкек мектебінің біріне берілді

Қазақ жазушысы, Қазақстан Президенті Қасым-Жомарт Тоқаевтың әкесі Кемел Тоқаевтың есімі Бішкектегі мектептердің біріне берілді, деп хабарлайды qandastar.kz сайты. 

«Бішкек қаласындағы №33 мектеп-гимназияға қазақ жазушысы әрі Қазақстан Президенті Қасым-Жомарт Тоқаевтың әкесі Кемел Тоқаевтың есімі берілді», – деді Қырғызстан Президентінің баспасөз хатшысы Аскат Алагозов.

Оның айтуынша, бұл бастама Қырғызстан Президенті Садыр Жапаровқа тиесілі.

«Жапаров бұл шешім жайлы Қасым-Жомарт Тоқаевқа Ресейге жасаған жұмыс сапары кезінде хабарлаған. Ұлы Отан соғысы жылдарында Кемел Тоқаев сол кездегі қазіргі №33 мектеп ғимаратында орналасқан Фрунзе жаяу әскер училищесінде білім алған. Осы жерден ол майданға аттанған», – делінген хабарламада.

Кемел Тоқаевич Тоқаев (1923 жылдың 2 қазаны, Алматы облысы, Қаратал ауданы, Кальпе ауылы – 1986 жылдың 6 қазаны, Алматы) – қазақ кеңестік жазушысы, журналист және редактор, қазақ әдебиетіндегі детектив жанрының негізін қалаушы. Ұлы Отан соғысының ардагері, Сталинград шайқасына қатысқан. «Ерлігі үшін» медалі мен басқа да әскери наградалармен марапатталған. Соғыстан кейін Қазақ мемлекеттік университетінің филология факультетін тәмамдап, «Қазақстан пионері», «Социалистік Қазақстан» сияқты ірі газеттерде редактор және бас редактор болып жұмыс істеді. 1960–1977 жылдар аралығында Қазақ КСР Жоғарғы Кеңесінің «Ведомостар» газетінің бас редакторы қызметін атқарды. «Қастандық іздері», «Соңғы соққы», «Солдат соғысқа кетті» секілді туындылары қазақ детективі мен шытырман оқиғалы прозаның классикасына айналған. Кемел Тоқаев ұлттық әдебиеттің дамуына елеулі үлес қосты.