جاڭالىقتار
قازاقستاندىق پروديۋسەر 5 جىلعا سوتتالدى
بۇرىنعى مادەنيەت جانە سپورت ۆيتسە-ءمينيسترى ەرلان قوجاعاپانوۆتىڭ ىسىمەن بايلانىستى SUCCESS K ءىرى يۆەنت-اگەنتتىگىنىڭ باسشىسى لياززات كوككوزوۆاعا سوت ۇكىمى شىقتى, دەپ حابارلايدى qandastar.kz Ulysmedia.kz-كە سىلتەمە جاساپ.
كوككوزوۆاعا قانداي ايىپ تاعىلدى
قوجاعاپانوۆ ىسىنە قاتىستى تاعى ءبىر ادام ءلاززات كوككوزوۆاعا 2018 جىلى پەتروپاۆلدا وتكەن قازاقستان مەن رەسەيدىڭ XV وڭىرارالىق ىنتىماقتاستىق فورۋمىن ۇيىمداستىرۋ كەزىندە بيۋدجەت قارجىسىن جىمقىردى دەگەن ايىپ تاعىلدى.
سوت ۇكىمى بويىنشا كوككوزوۆا بەس جىلعا باس بوستاندىعىنان ايىرىلدى.
كوككوزوۆانىڭ ءىسى تۋرالى
قازاقستانداعى كرەاتيۆتى يندۋستريادا لياززات كوككوزوۆانىڭ ەسىمى كەڭىنەن تانىمال. ول پرەزيدەنت قاتىسقان كوپتەگەن ءىرى شارالاردى ۇيىمداستىرعان, سونداي-اق 2000-جىلداردىڭ باسىنداعى ەڭ تانىمال تەلەجوبالاردىڭ ءبىرى – «ءححى عاسىر كوشباسشىسى» باعدارلاماسىنىڭ نەگىزىن قالاۋشىلاردىڭ قاتارىندا بولعان.
سوت پروتسەسى باستالعان كەزدە ونىڭ جاسى 61-دە ەدى. ەرلان قوجاعاپانوۆپەن سالىستىرعاندا, تەرگەۋ بارىسىندا لياززات كوككوزوۆا تەرگەۋ يزولياتورىندا ەمەس, دەنساۋلىعىنا بايلانىستى ۇيقاماقتا بولدى.
الايدا ايىپتاۋشى تاراپتىڭ نۇسقاسىنا سايكەس, كوككوزوۆاعا قوجاعاپانوۆقا قاراعاندا اۋىر جازا قاۋپى ءتونىپ تۇر: وعان مۇلكىن تاركىلەۋ جانە ۇزاق مەرزىمگە باس بوستاندىعىنان ايىرۋ جازاسى سۇرالعان. قازاقستاندا تانىمال PR-ماماننىڭ پىكىرىنشە, تەرگەۋشىلەر كوككوزوۆانى قۇرال رەتىندە عانا پايدالانعان.
– مەن دە, وتباسىم دا بۇل ىستە تەك “قۇرال” بولدىق. تەرگەۋ ءۇشىن قوجاعاپانوۆتى سوتقا تارتۋ جولىنداعى مۇمكىندىك بولدىق. بۇل ارقىلى ولار پرەزيدەنتكە, كەيىن قوعامعا «جەمقورلىقپەن ىمىراسىز كۇرەسىپ جاتقانىن» كورسەتكىسى كەلگەن سياقتى. قازىر مۇنداي “جەڭىستەردى” جاريا ەتۋگە سەبەپ تە ازايىپ كەتتى. باسقا سەبەپ كورىپ تۇرعان جوقپىن, – دەيدى لياززات كوككوزوۆا.
كوككوزوۆانىڭ ءوزى, كۇيەۋى مەن قىزىنا تيەسىلى بارلىق بانك شوتتارى بۇعاتتالعان. SUCCESS K كومپانياسىنىڭ جۇمىسى توقتاپ قالدى. ونىڭ ايتۋىنشا, جۇيكەسىنە سالماق ءتۇسىپ, دەنساۋلىعى كۇرت ناشارلاپ, سال اۋرۋىنا شالدىعىپ قالعان.
– ءبىز مەملەكەتتەن ەشقاشان كومەك سۇراعان ەمەسپىز. كەرىسىنشە, وتباسىمىز سالىقتى ۋاقىتىندا تولەپ, زاڭدى ەشقاشان بۇزعان جوق. ءبىز مەملەكەتتەن تەك ءبىر عانا نارسە كۇتتىك – زاڭ ۇستەمدىگى مەن قاۋىپسىزدىك. ەگەر ونى دا قامتاماسىز ەتە الماسا, وندا بۇل ەلدە ءومىر ءسۇرۋدىڭ ءمانى قانداي? – دەيدى ول كۇيزەلىسپەن.
كوككوزوۆانىڭ ايتۋىنشا, ءوزىن ەڭ قاتتى كۇيرەتكەن نارسە – تەرگەۋ بارىسىندا كۋالاردان قىسىم ارقىلى “قاجەتتى” جاۋاپتار الىندى دەگەن سەنىم.
– بۇل زاڭسىز تەرگەۋ اياسىندا ادام قۇقىعىنىڭ ويعا كەلەتىن-كەلمەيتىن بارلىق نورماسى بۇزىلدى. كۋالاردىڭ بارلىعى – ايەلدەر. ولار پسيحولوگيالىق قىسىمعا ۇشىرادى. تەرگەۋشىلەر قىزمەتتىك وكىلەتىن اسىرا پايدالانىپ, شەكتەن شىققان ارەكەتتەرگە بارعان. بالامەن قورقىتۋ, جىنىستىق مازمۇنداعى قۋدالاۋ, تۋىستارىنا زومبىلىق جاساۋعا دوق كورسەتۋ, ەموتسيونالدىق كۇيزەلىس پەن پسيحولوگيالىق كۇيرەتۋگە جەتكىزۋ, جالعان ءىس قوزعايمىز دەپ ۇركىتۋ – ءبارى بولدى, – دەپ تىزبەلەدى ول.
مۇنداي تەرگەۋ تاسىلدەرى تۋرالى ول ءوز قىزمەتكەرلەرىنەن ەستىگەن. ونىڭ پايىمداۋىنشا, نەگىزگى ايىپتاۋشى كۋا – تۋريزم يندۋسترياسى كوميتەتى توراعاسىنىڭ بۇرىنعى ورىنباسارى گۇلزات جۋاسپايەۆا دا ءدال وسىنداي قىسىم كورىپ, جاۋاپ بەرگەن بولۋى مۇمكىن.
