اقتاۋدا «قازمۇنايگاز» ۇلتتىق كومپانياسىنىڭ وكىلدىگى اشىلدى

بۇگىن اقتاۋ قالاسىندا «قازمۇنايگاز» ۇك اق وكىلدىگى ءوز جۇمىسىن باستادى. سالتاناتتى شاراعا قمگ باسقارما توراعاسى ماعزۇم مىرزاعاليەۆ قاتىستى. وكىلدىكتىڭ ءوفيسى ۇلتتىق كومپانيانىڭ ەنشىلەس كاسىپورنى — «قازاقتەڭىزكولىكفلوتى» ۇتكقك» جشس عيماراتىندا ورنالاسقان.

ماڭعىستاۋ وبلىسىنىڭ ورتالىعىنداعى قىزمەتتىك وفيس باتىس وڭىرىندە جۇمىس ىستەيتىن كومپانيالارعا ءتۇرلى باعىتتا قىزمەت كورسەتۋدى كوزدەيدى. ولاردىڭ قاتارىندا ورتالىق مەملەكەتتىك ورگاندارمەن, جەرگىلىكتى بيلىكپەن, «قازمۇنايگاز» كومپانياسىنىڭ ەنشىلەس جانە مەردىگەرلەرىك ۇيىمدارىنىڭ كاسىپوداقتارىمەن بىرلەسە ارەكەت ەتۋ, وندىرىستىك باعدارلامالاردىڭ, جوسپارلانعان كورسەتكىشتەردىڭ ورىندالۋ بارىسى مەن كەن ورىندارىن يگەرۋ ءىسىن باقىلاۋ بار. سونىمەن قاتار, اتاۋلى وكىلدىك تۇرعىنداردى جۇمىسپەن قامتۋ بويىنشا شارالاردى, ەنشىلەس ۇيىمدارداعى ەڭبەكاقى تولەۋدىڭ بىرىڭعاي جۇيەسى مەن كادر ماسەلەلەرىن ۇيلەستىرەدى. جەكە جانە زاڭدى تۇلعالار ەنشىلەس ۇيىمداردىڭ قىزمەتىنە قاتىستى وتىنىشتەرىن, ۇسىنىس-تىلەكتەرىن دە وسى وكىلدىككە تاپسىرا الادى.

وكىلدىكتىڭ اشىلۋىندا ءسوز العان «قازمۇنايگاز» ۇك باسقارما توراعاسى ماعزۇم مىرزاعاليەۆ جاڭا ورتالىقتىڭ الدىندا ماڭىزدى مىندەتتەر تۇرعانىنان اتاپ ءوتتى.

«ءبىز ماڭعىستاۋ وبلىسىندا ءوڭىر تۇرعىندارىنىڭ الەۋمەتتىك ءال-اۋقاتىن جاقسارتۋ باعىتىندا بىرقاتار باستامانى ىسكە اسىرىپ جاتىرمىز. مۇناي مەن گاز قورلارىن ۇلعايتۋ جانە ءوندىرۋ بويىنشا ينۆەستيتسيالىق جوبالار قولعا الىندى. دەمەك, اقتاۋدا اشىلعان وكىلدىككە جۇكتەلگەن مىندەت زور. وعان قوسا, كومپانيانىڭ توپ-مەنەدجمەنتى مەن ماماندارىنىڭ ءدال وسى جەردە جۇمىس ىستەۋى وندىرىستىك جانە الەۋمەتتىك ماسەلەلەردى جەدەل ءارى بارىنشا ءتيىمدى شەشۋگە مۇمكىندىك بەرەدى», — دەپ اتاپ ءوتتى م.مىرزاعاليەۆ.

اقتاۋ وكىلدىگىن قمگ باسقارما توراعاسىنىڭ بارلاۋ جانە ءوندىرۋ جونىندەگى ورىنباسارى قۇرمانعازى ەسقازيەۆ باسقاراتىن بولادى.
ايتا كەتەيىك, بۇگىندە ماڭعىستاۋ وبلىسىندا «قازمۇنايگاز» ۇلتتىق كومپانياسىنا قاراستى 18 كاسىپورىندا 32,5 مىڭنان استام ادام ەڭبەك ەتەدى. ال كومپانيانىڭ ايماقتا مۇناي وندىرۋدەگى ۇلەسى 43 پايىزدى قۇرايدى.

سونىمەن قاتار ماعزۇم مارات ۇلى ماڭعىستاۋ وبلىسىنا جۇمىس ساپارى بارىسىندا تاياۋ كۇندەرى تەحنيكالىق رەجيمدە ىسكە قوسىلاتىن قاراجانباس كەن ورنىنداعى سۋدى تۇششىلاندىرۋ زاۋىتىنا باردى. مۇندا مۇنايمەن بىرگە وندىرىلەتىن قاباتتىق سۋ تۇششىتىلادى. سول ارقىلى «قاراجانباسمۇناي» اق وندىرىسكە جانە تۇرمىسقا قاجەتتى سۋمەن ءوزىن تولىق قامتاماسىز ەتەتىن بولادى. بۇل ءوز كەزەگىندە استراحان — ماڭعىشلاق ماگيسترالدىق سۋ قۇبىرىنان الاتىن سۋدى ءوڭىر تۇرعىندارىنىڭ يگىلىگىنە باعىتتاۋعا جاعداي جاسايدى.

«وبلىس تۇرعىندارىن تازا اۋىزسۋمەن قامتۋدى كوزدەيتىن جوبالار مەملەكەت باسشىسى قاسىم-جومارت توقاەۆتىڭ ەرەكشە باقىلاۋىندا. وسى ورايدا قويىلعان مىندەتتەردى ورىنداۋ جاۋاپكەرشىلىگىنىڭ ءبىر بولىگى «قازمۇنايگاز» كومپانياسىنا جۇكتەلگەنىن اتاپ ءوتۋ كەرەك. وسى ماقساتتا كومپانيا كەندىرلى كەنتىندە تەڭىز سۋىن تۇششىتۋ زاۋىتىن سالۋدى جانە استراحان — ماڭعىشلاق سۋ تارتۋ قۇبىرىن جاڭعىرتۋدان وتكىزىپ, كەڭەيتۋدى جوسپارلاپ وتىر», — دەدى باسقارما توراعاسى.

ماعزۇم مىرزاعاليەۆ «وزەنمۇنايگاز», «قازگوز» جانە «ماڭعىستاۋمۇنايگاز» كاسىپورىندارىنىڭ وندىرىستىك نىساندارىن دا ارالادى. ەنشىلەس كاسىپورىنداردىڭ باسشىلارى ماڭعىستاۋ وبلىسىن الەۋمەتتىك-ەكونوميكالىق دامىتۋدىڭ 2021-2025 جىلدارعا ارنالعان كەشەندى جوسپارى اياسىندا «قازمۇنايگاز» كومپانياسى اتقاراتىن الەۋمەتتىك جوبالار مەن شارالاردىڭ قازىرگى بارىسى تۋرالى باياندادى.

بۇل جوسپار اياسىندا قمگ-نىڭ قاتىسۋىمەن وڭىردە جالپى سوماسى 425 ملرد تەڭگە بولاتىن 22 جوبا مەن شارا جۇزەگە اسپاق. ولاردىڭ اراسىندا كاسىپورىندار توبى مەن ولاردىڭ مەردىگەر ۇيىمدارىندا الەۋمەتتىك تۇراقتىلىقتى ساقتاۋ, ينۆەستيتسيالىق جوبالاردى ىسكە اسىرۋ, جاڭا جۇمىس ورىندارىن قۇرۋ جانە الەۋمەتتىك جوبالاردى قارجىلاندىرۋ شارالارى بار.