«О́zińdi, óz isińdi tap!»

Kezdesýge Petropavl qalasynyń jastary, belsendiler jáne qala turǵyndary qatysty.

Is-shara spıkerleri , «Ravnaıa doroga» avtomektebiniń dırektory, Qazaqstandaǵy múmkindigi shekteýli jandarǵa arnalǵan alǵashqy avtomekteptiń negizin qalaýshy, «Qyzyljar adaldyq alańy» jobalyq keńsesiniń múshesi  — Sálimhan Sabıtov jáne qoǵam belsendisi qalalyq máslıhat depýtaty Vladımır Vtıchenko boldy.

Sábıt myrza kezdesý qatysýshylaryna óz qyzyǵýshylyǵyńdy, hobbıińdi, súıikti isińdi, kúndelikti jasaıtyn sharýańdy qalaı kásip etýge bolatyndyǵyn, sonymen qatar qulyqsyzdyqtan, jalqaýlyqtan, qulshynys, talpynys joqtyqtan qalaı arylýǵa bolatyndyǵyn aıtty.

«Adam áýeli bul ómirdegi óziniń mıssııasyn, ózin, óz isin tabýy qajet. Ol nemen shuǵyldanǵandy unatatynyn, ne nárse oǵan shabyt beretinin, qandaı is jasaǵanda jumys jasap jatqanyn emes, demalyp jatqanyn uǵýy qajet. Sol arqyly óziniń isin taýyp, tabys tabýǵa jol ashatyn qulyptyń kiltin jasaýy qajet. Máselen, bir adam tamaq pisirýdi, endi biri ańǵa shyqqandy, al basqa bir adam jaı qydyrǵandy unatýy múmkin. Jaqsy kóretin isten de tabys kózin jasap alýǵa bolady. Tamaq pisirip sat, ańǵa shyǵýǵa qajetti zattardy jalǵa ber, qydyrýǵa arnalǵan týrlar uıymdastyr. Mine, kórdińiz be, kásiptiń negizi – jaqsy kórip jasaýda jatyr» dedi Sábıt myrza óz sózinde.

Sonymen qatar sharaǵa qalalyq jumyspen qamtý ortalyǵynyń qyzmetkerleri de qatysyp, jastarǵa bos jumys oryndaryn usynyp, jumyssyzdyqpen kúresýge qatysty jasalyp jatqan osyndaı sharalardyń mańyzdylyǵyn atap ótti.

Máslıhat depýtaty Vladımır Vıtchenko jastarǵa qoǵamda belsendi bolýǵa shaqyrdy:

«Qoǵamdyq sharalardan kóbine jastar qashqaqtap, qatysqysy kelmeı, túk paıdasy joq dep oılaıdy. Alaıda aıtpaǵym, kez kelgen osyndaı sharalar qoǵam úshin jasalatyndyqtan, qoǵamnyń bólshegi retinde myna – biz qashan da biz úshin uıymdastyrylyp jatqan dúnıelerden qashpaýymyz kerek. Belsendi bolyp, óz pikirimizdi bildirýden, oıymyzdy jetkizýden, dittegen ıdeıamyzdy iske asyrýdan, kedergilerge qaramastan oılaǵanymyzdy iske asyrýdan qoryqpaýymyz qajet. Al sondaı úreıdi seıilteýge búgingi ótken shara sekildi jigerli kezdesýler kómektesedi» dep qosty ol.

Kezdesý barysynda jınalǵan jastar spıkerlerge túrli suraqtar qoıyp, óz oılarymen, tyń ıdeıalarymen, oıǵa alǵan bastamalarymen bólisip, keńes aldy.