2022 جىلعى 3-5 تامىزدا ورتسايلاۋكوم اۋماقتىق سايلاۋ كوميسسيالارىنا ارنالعان سەمينار-كەڭەس وتكىزدى

اعىمداعى جىلعى 3-5 تامىزدا ورتالىق سايلاۋ كوميسسياسى وبلىستاردىڭ, رەسپۋبليكالىق ماڭىزى بار قالالاردىڭ جانە استانانىڭ اۋماقتىق سايلاۋ كوميسسيالارىنىڭ توراعالارىنا ارنالعان سەمينار-كەڭەس وتكىزدى. ءۇش كۇندىك جۇمىس سەسسيالارى كەزىندە نەگىزگى سپيكەرلەر, ياعني ورتسايلاۋكوم توراعاسى نۇرلان ءابدىروۆ, توراعانىڭ ورىنباسارى كونستانتين پەتروۆ, سونداي-اق وسك مۇشەلەرى سابيلا مۇستافينا, اناستاسيا ششەگورتسوۆا, اسىلبەك سماعۇلوۆ جانە شاۆحات وتەمىسوۆ ءسوز سويلەدى.

سەمينار-كەڭەستىڭ ءبىرىنشى كۇنى رەسپۋبليكالىق رەفەرەندۋم ناۋقانىنىڭ قورىتىندىلارىنا ارنالدى. كوميسسيالاردىڭ رەفەرەندۋمدى دايىنداۋ بويىنشا اتقارعان جۇمىستارى, داۋىس بەرۋ كۇنىن ۇيىمداستىرۋ, ونىڭ ىشىندە مۇگەدەكتىگى بار جاندارعا جاعداي جاساۋ ماسەلەلەرى تالقىلاندى. سونداي-اق, اقپاراتتىق, قارجىلىق قامتاماسىز ەتۋگە, رەفەرەندۋمعا قاتىسۋشىلاردى وقىتۋ قورىتىندىلارىنا, جەكە جانە زاڭدى تۇلعالاردىڭ وتىنىشتەرىن, سونداي-اق سوت اكتىلەرىن قاراۋعا تالداۋ جۇرگىزىلدى. اۋماقتىق سايلاۋ كوميسسيالارىنىڭ وكىلدەرى رەفەرەندۋمعا دايىندىق جانە ونى وتكىزۋ كەزەڭىندەگى ءتۇرلى قىزمەت باعىتتارى بويىنشا جۇمىس تاجىريبەلەرىمەن ءبولىستى. سەميناردىڭ ءبىرىنشى بولىگىنىڭ قورىتىندىلارى بويىنشا بەلسەندى پىكىر الماسۋ بولدى جانە رەفەرەندۋم ناۋقانىنىڭ قورىتىندىلارىن ەسكەرە وتىرىپ, اۋماقتىق سايلاۋ كوميسسيالارىنىڭ بۇدان بىلايعى جۇيەلى جۇمىستارىنا قاتىستى بىرقاتار تاپسىرمالار بەرىلدى.

ەكىنشى كۇنى سەمينارعا قاتىسۋشىلارعا پرەزيدەنت قاسىم-جومارت توقاەۆتىڭ قازاقستان حالقىنا جولداۋىن ىسكە اسىرۋ اياسىندا ۇكىمەت تاراپىنان سايلاۋ زاڭناماسىنا ەنگىزۋ ءۇشىن ۇسىنىلىپ وتىرعان وزگەرىستەر مەن تولىقتىرۋلاردىڭ جوباسى العا تارتىلدى. وسك مۇشەلەرى اۋماقتىق سايلاۋ كوميسسيالارىنا ءماجىلىس جانە ءماسليحات دەپۋتاتتارىن سايلاۋ كەزىندە ارالاس سايلاۋ جۇيەسىن ەنگىزۋگە, اكىمدەردى سايلاۋ تاجىريبەسىن دامىتۋعا, الەۋمەتتىك جەلىلەردەگى ۇگىتتتى قۇقىقتىق رەتتەۋگە, ۇلتتىق بايقاۋشىلاردىڭ قىزمەتىنە, سايلاۋدى مەملەكەتتىك ەمەس قارجىلاندىرۋعا جانە سايلاۋ پروتسەسىن جاڭعىرتۋ جونىندەگى وزگە دە باعىتتارعا بايلانىستى زاڭناما جاڭالىقتارىن ەگجەي-تەگجەيلى ءتۇسىندىردى. سونىمەن قاتار, اكىمشىلىك راسىمدىك-پروتسەسسۋالدىق نەگىزدەر مەن سايلاۋ داۋلارىن قاراۋ ءتارتىبى قارالدى. تالقىلاۋ قورىتىندىسى بويىنشا اۋماقتىق سايلاۋ كوميسسيالارىنا سايلاۋ زاڭناماسى مەن قۇقىق قولدانۋ پراكتيكاسىن ودان ءارى جەتىلدىرۋ بويىنشا ۇسىنىستار مەن ۇسىنىمدار بەرۋ تاپسىرىلدى.

ءۇشىنشى كۇنى اۋماقتىق سايلاۋ كوميسسيالارىنىڭ قۇرامىن كاسىبيلەندىرۋ ماسەلەسى تالقىلاندى. قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ ەلەكتوراتتىق وقىتۋ ورتالىعىنىڭ ديرەكتورى جانار بۇقانوۆا وسى ورتالىقتىڭ بازاسىندا سايلاۋ پروتسەسىنە قاتىسۋشىلاردى دايارلاۋ جانە وقىتۋ جونىندەگى الداعى جۇمىس جوسپارلارىمەن ءبولىستى.

سەمينار سوڭىندا ورتالىق سايلاۋ كوميسسياسىنىڭ توراعاسى نۇرلان ءابدىروۆ اۋقىمدى جۇمىس اتقارىلىپ وتىرعانىن, رەسپۋبليكالىق رەفەرەندۋمعا قورىتىندى جاسالعانىن, نەگىزگى مىندەتتەر تۇسىندىرىلە وتىرىپ, ەلىمىزدە جۇرگىزىلىپ وتىرعان كونستيتۋتسيالىق-ساياسي رەفورمالاردى ىسكە اسىرۋ بويىنشا ودان ءارى قادامدار بەلگىلەنگەنىن, سونداي-اق بىرقاتار ناقتى تاپسىرمالار بەرىلگەنىن اتاپ ءوتتى.