ماڭعىستاۋ وبلىسىندا وزەن كەن ورنىن وڭالتۋ ماسەلەلەرى قارالدى

2022 جىلدىڭ 9 قىركۇيەگىندە ماڭعىستاۋ وبلىسىندا وزەن كەن ورنىن وڭالتۋ ماسەلەلەرىنە ارنالعان جيىن ءوتتى. شاراعا «قازمۇنايگاز» ۇك اق باسقارما توراعاسى ماعزۇم مىرزاعاليەۆ, «وزەنمۇنايگاز» اق باس ديرەكتورى ماقسات يباعاروۆ, «قمگ ينجينيرينگ» جشس باس ديرەكتورى باقىتجان حاسانوۆ, مۇناي-گاز سالاسىنىڭ ارداگەرلەرى, گەولوگتار, قوعام قايراتكەرلەرى جانە جاڭاوزەن قالاسىنىڭ دەپۋتاتتارى قاتىستى.

ەسكە سالا كەتەيىك, قر پرەزيدەنتى قاسىم-جومارت توقاەۆ 2021 جىلدىڭ قىركۇيەگىندە وتكەن ماڭعىستاۋ وبلىسىنىڭ الەۋمەتتىك-ەكونوميكالىق دامۋى جونىندەگى كەڭەستە «قازمۇنايگاز» ۇلتتىق كومپانياسىنا مۇناي كەن ورىندارىنىڭ بىرتە-بىرتە توزۋىنا, 2030 جىلعا قاراي وندىرىلەتىن مۇنايدىڭ ازايۋىنا بايلانىستى وڭىردە گەولوگيالىق-بارلاۋ جۇمىستارىنىڭ جەكە جوسپارىن ازىرلەۋدى تاپسىردى. وسىعان بايلانىستى مەملەكەت باسشىسىنىڭ تاپسىرماسىنا سايكەس وزەن جانە قاراماندىباس كەن ورىندارىن وڭالتۋ جوسپارىنىڭ تۇجىرىمداماسى ازىرلەندى.

كەن ورىنداردى وڭالتۋ شارالارى مۇناي ءوندىرۋ دەڭگەيىن كەزەڭ-كەزەڭىمەن بىرنەشە جىلدا 6-6,5 ملن تونناعا جەتكىزىپ, وسى كورسەتكىشتى الداعى 10 جىل بويى ساقتاپ تۇرۋعا مۇمكىندىك بەرەدى دەپ كۇتىلەدى.

«ازىرلەنىپ جاتقان جوسپار جاڭاوزەن قالاسىنىڭ الەۋمەتتىك-ەكونوميكالىق تۇراقتىلىعىن قامتاماسىز ەتۋگە دە ەلەۋلى ۇلەس قوسادى دەپ ەسەپتەيمىن», — دەدى م.مىرزاعاليەۆ. «بۇگىنگى كۇنى «وزەنمۇنايگاز» مۇناي ءوندىرۋ كورسەتكىشتەرىن تولىق ورىنداي الماي وتىر. تەحنيكالىق جانە گەولوگيالىق ماسەلەلەرگە بايلانىستى مۇناي ءوندىرۋ كولەمىن بىرقالىپتى دەڭگەيدە ۇستاپ تۇرۋ قيىنعا سوعۋدا».

قمگ باسشىسىنىڭ ايتۋىنشا, جىل سايىنعى كۇردەلى سالىمداردىڭ دەڭگەيىنە قاراماستان, ومگ كەن ورىندارىندا مۇناي ءوندىرۋ كولەمى ازايىپ بارادى. بۇنىڭ سالدارىنان كومپانيانىڭ كىرىسى دە تومەندەپ, قازىرگى قىزمەتكەرلەر سانىن ساقتاپ قالۋعا جانە ولارعا ەڭبەكاقى تولەۋ بويىنشا الەۋمەتتىك مىندەتتەمەلەردى ورىنداۋ دا قيىن بولادى. م.مىرزاعاليەۆ «وزەنمۇنايگاز» اق مۇناي ءوندىرۋ رەنتابەلدىلىگىنىڭ شەگىنە 2024 جىلى كەلەتىنىن اتاپ ايتتى.

اقتاۋ قالاسىنا جۇمىس ساپارى بارىسىندا م.مىرزاعاليەۆ ماڭعىستاۋ وبلىسىنىڭ كاسىپوداق باسشىلارىمەن كەزدەستى. كەزدەسۋدە ەڭبەك ۇجىمدارىن كوپ تولعاندىراتىن ماسەلەلەر, سونىڭ ىشىندە ەڭبەكاقى جانە ەلەكتر ەنەرگياسىنىڭ كەنىشتەردە ءجيى ءوشىرىلۋى تالقىلاندى. قمگ باسقارما توراعاسى جاڭاوزەن قالاسىن دامىتۋعا باعىتتالعان قمگ جوبالارىنا بولەك توقتالدى: «استراحان-ماڭعىشلاق» ماگيسترالدى سۋ قۇبىرىن رەكونسترۋكتسيالاۋ جانە كەڭەيتۋ, كەندىرلىدە سۋ تۇششىتۋ زاۋىتىن جانە جاڭاوزەندە جاڭا گاز وڭدەۋ زاۋىتىن سالۋ.

جاڭاوزەن قالاسىنا الەۋمەتتىك قولداۋ كورسەتۋ اياسىندا كومپانيا ەكى سپورت كەشەنىنىڭ قۇرىلىسىن اياقتاپ قالدى, وقۋشىلار سارايى جوباسى بويىنشا جۇمىستار باستالدى جانە قالادا 16 سپورت الاڭىن سالۋ تۋرالى شەشىم قابىلداندى. بۇدان بولەك, ۇلتتىق كومپانيا «جارقىن بولاشاق» باعدارلاماسى بويىنشا ەلىمىزدىڭ ۇزدىك كوللەدجدەر مەن مەكتەپ-ينتەرناتتارىنا وقۋعا قابىلدانعان جاڭاوزەننىڭ دارىندى بالالارىنا وقۋ مەن تۇرۋ اقىسىن تولەيدى.