جاڭالىقتار
پرەزيدەنت شىمكەنت مۇناي وڭدەۋ زاۋىتىنىڭ وندىرىستىك قۋاتىمەن تانىستى
قاسىم-جومارت توقاەۆ شىمكەنت قالاسىنا جۇمىس ساپارى بارىسىندا شىمكەنت مۇناي وڭدەۋ زاۋىتىنا باردى.
زاۋىتتى باسقارۋشى كومپانيا – «پەترو قازاقستان ويل پروداكتس» جشس-ءنىڭ پرەزيدەنتى ەربولات قوجاباەۆ مەملەكەت باسشىسىنا قايتا جاڭعىرتۋدان وتكەن ءوندىرىستىڭ قازىرگى جۇمىسى تۋرالى باياندادى.
بۇگىندە زاۋىتتىڭ جوبالىق قۋاتى جىلىنا 6 ميلليون توننا مۇناي وڭدەي الاتىن دەڭگەيگە جەتىپ, ك-4, ك-5 ەكولوگيالىق ساناتىنداعى جانار-جاعارماي وندىرە باستاعان.
بۇدان كەيىن زاۋىت جۇمىسشىلارىمەن اڭگىمەلەسكەن پرەزيدەنت ءوندىرىس ورنىنىڭ ستراتەگيالىق ماڭىزىنا توقتالدى.
– قازىر زاۋىت ىشكى نارىقتىڭ 40 پايىزىن قامتاماسىز ەتىپ وتىر. ءونىمنىڭ ساپاسى دا جاقساردى. بۇل – وتە اۋقىمدى جۇمىس. وسىنىڭ ءبارى سىزدەردىڭ, ياعني جۇمىسشىلاردىڭ قاجىرلى ەڭبەگىنىڭ ارقاسىندا مۇمكىن بولىپ وتىر, – دەدى قاسىم-جومارت توقاەۆ.
سوڭعى ءۇش جىلدا زاۋىتتىڭ بەنزين ءوندىرىسى 2,1 ميلليون تونناعا, اۆياكەروسين ءوندىرىسى 340 مىڭ تونناعا, ديزەل وتىنى 1,9 ميلليون تونناعا دەيىن ارتقان. ءونىم تولىقتاي ىشكى نارىققا وتكىزىلەدى.