Prezıdent Shymkent munaı óńdeý zaýytynyń óndiristik qýatymen tanysty

Qasym-Jomart Toqaev Shymkent qalasyna jumys sapary barysynda Shymkent munaı óńdeý zaýytyna bardy.

Zaýytty basqarýshy kompanııa – «Petro Qazaqstan Oıl prodakts» JShS-niń prezıdenti Erbolat Qojabaev Memleket basshysyna qaıta jańǵyrtýdan ótken óndiristiń qazirgi jumysy týraly baıandady.

Búginde zaýyttyń jobalyq qýaty jylyna 6 mıllıon tonna munaı óńdeı alatyn deńgeıge jetip, K-4, K-5 ekologııalyq sanatyndaǵy janar-jaǵarmaı óndire bastaǵan.

Budan keıin zaýyt jumysshylarymen áńgimelesken Prezıdent óndiris ornynyń strategııalyq mańyzyna toqtaldy.

– Qazir zaýyt ishki naryqtyń 40 paıyzyn qamtamasyz etip otyr. О́nimniń sapasy da jaqsardy. Bul – óte aýqymdy jumys. Osynyń bári sizderdiń, ıaǵnı jumysshylardyń qajyrly eńbeginiń arqasynda múmkin bolyp otyr, – dedi Qasym-Jomart Toqaev.

Sońǵy úsh jylda zaýyttyń benzın óndirisi 2,1 mıllıon tonnaǵa, avıakerosın óndirisi 340 myń tonnaǵa, dızel otyny 1,9 mıllıon tonnaǵa deıin artqan. О́nim tolyqtaı ishki naryqqa ótkiziledi.