الماتىدا 7 مىڭنان استام ستۋدەنت قوسىمشا جاتاقحانالار مەن حوستەلدەرگە ورنالاستى

سوڭعى ءۇش اپتادا الماتىداعى 35 جوعارى وقۋ ورنىنىڭ 7 مىڭنان استام ستۋدەنتى قوسىمشا  جاتاقحانالار مەن حوستەلدەرگە ورنالاستى. كەيبىر جوعارعى وقۋ ورىندارى ءوز ستۋدەنتتەرى ءۇشىن جەكەمەنشىك جاتاقحانالار مەن حوستەلدەردى جالعا الدى, ال كەيبىر ينستيتۋتتار ءوز بالانسىنداعى عيماراتتاردى ستۋدەنتتەر باسپاناسىنا اينالدىردى.

ماسەلەن, اباي اتىنداعى قازاق ۇلتتىق پەداگوگيكالىق ۋنيۆەرسيتەتى ستۋدەنتتەردى قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتىنىڭ, ەۋرازيالىق تەحنولوگيا ۋنيۆەرسيتەتىنىڭ جاتاقحانالارىنا قوسىمشا ورنالاستىردى. سونداي-اق, ۋنيۆەرسيتەت ءوز ستۋدەنتتەرى ءۇشىن جەكەمەنشىك جاتاقحانالار مەن حوستەلدەردەن جاتىن ورىن جالدادى.

Satbayev University, حالىقارالىق ءبىلىم بەرۋ كورپوراتسياسى, «تۇران» ۋنيۆەرسيتەتى جانە باسقا دا جوعارى وقۋ ورىندارى جوعارى كۋرس ستۋدەنتتەرى ءۇشىن قوسىمشا باسپانالاردى, ونىڭ ىشىندە جەرگىلىكتى كاسىپكەرلەردەن جاتاقحانالار مەن حوستەلدەردى جالعا الدى.

ايتا كەتەيىك, الماتى شاھارىنداعى ءبىرىنشى كۋرس ستۋدەنتتەرى جاڭا وقۋ جىلىنىڭ باسىندا تولىق جاتاقحانالارعا ورنالاستى. ستۋدەنتتەردى باسپانامەن قامتۋ ماسەلەسى عىلىم جانە جوعارى ءبىلىم مينيسترلىگىنىڭ باقىلاۋىندا تۇرادى.

«ءبىز جوعارى وقۋ ورىندارىمەن بىرلەسىپ ستۋدەنتتەردى جاتاقحاناعا ورنالاستىرۋ ماسەلەسىن شەشىپ جاتىرمىز. ستۋدەنتتەردىڭ باسىم بولىگى باسپانامەن قامتىلدى. ەسكەرتە كەتەيىك, مينيسترلىككە قاراستى ستۋدەنتتەردى جاتاقحانالارمەن قامتاماسىز ەتۋ جونىندەگى جەدەل شتابى جۇمىسىن جالعاستىرىپ, تۇرعىن ۇيگە مۇقتاج ستۋدەنتتەرگە قومەكتەسەدى. بۇل جۇمىس توقتامايدى», — دەپ اتاپ ءوتتى قر عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ.

سونىمەن قاتار, الماتى قالاسىنىڭ اكىمدىگى قارجى ورتالىعىمەن بىرلەسىپ قالا كاسىپكەرلەرىمەن جۇمىس اتقاردى. ناتيجەسىندە, بيىلعى جىلدىڭ سوڭىنا دەيىن قولدانىستاعى 4 نىسان 655 توسەك-ورىنعا ارنالعان جاتاقحانا رەتىندە قايتا جاساقتالىپ, پايدالانۋعا بەرىلەدى.

بۇگىنگى تاڭدا 104 ازاماتتىق جوعارعى وقۋ ورنىندا 309 جاتاقحانا بار, وندا 101 مىڭنان استام ستۋدەنت تۇرادى. ەلىمىز بويىنشا 2022 جىلدىڭ سوڭىنا دەيىن 5000 ورىندىق تاعى 17 جاتاقحانانى پايدالانۋعا بەرۋ جوسپارلانۋدا.