«Kelip ketken shoýlardy kinalaǵannan ne paıda?»: Muhamedjan Tazabek qoǵamdaǵy ózgeris týraly oı bólisti

Aıtysker aqyr ári qazir ózin koých retinde tanystyryp júrgen Muhamedjan Tazabek áleýmettik jelide jazba jarııalap,  oqyrmandaryn oılandyryp qoıdy, dep habarlaıdy Qandastar.kz.

Ol jazbasynda nápsi jaıynda sóz qozǵap, oqyrmandaryn túzý jolǵa shaqyrǵan.

– Shaıtan da, nápsi de adam balasy úshin synaq. Shaıtan – ata jaý, nápsi qoldanar quraly. Alla ár nárseni hıkmetpen jaratqan. Pende úshin negizgi problema olar emes. Negizgi problema – Alladan alystaý, Onyń panasynan shyǵyp qalý. Alla saqtamasa, bylamyqqa tis synady, taý arqalaǵan tasqa súrinedi…

Alla pana bolsa, qyryq jyl qyrǵynnan da aman shyǵasyń. Allanyń nazary tússe, óziń kúnádan tıylyp, sóziń izgilikke buıyryp, jaratylysqa zııanyń tımeı, Jaratqanǵa ıilip ótesiń…

Allańdy oılamasań, azǵyrýshy kep dosyńa aınalady…

Densaýlyǵyń syr berse, ótip bara jatqan ókpek jel, ketip bara jatqan kesel de seni izdep tabady…

Tynyshtyqty qadirlemeseń, yryń-jyryń irgeńnen ketpeı qoıady…

Jabyq kıimdi jaý sanasań, jalańashtyq kep, tórińde qol urǵyzady…

Tulǵańdy ardaq tutpasań, tuǵyrsyzdar kep kóshińniń tizginin ustaıdy…

Eshkimdi kinálap, eshkimge renjýdiń qajeti joq.

Esigiń ashyq tursa, kórshińdi ury tutqannan ne paıda, qazannan qaqpaq ketse, ıtti qýalaǵannan ne paıda, úlkende úlgi, kishide uıat azaısa, kelip ketken shoýlardy kinalaǵannan ne paıda?! “Jyn da beıimdini urady..!” (maqal), – dep jazdy Muhamedjan Tazabek.