фото: ашық дереккөз
2025 жылдың II тоқсанында қазақстандық бір үй шаруашылығы орта есеппен 1 млн 23 мың теңге жұмсаған. Оның 52%-ы азық-түлікке, 22%-ы басқа тауарларға, 20%-ы қызметтерге кеткен, деп хабарлайды qandastar.kz сайты Zakon.kz сайтына сілтеме жасап.
Аймақтық айырмашылықтар
Ең жоғары шығындар Ұлытау облысында (1 449 775 теңге), ең төменгісі Шымкентте (831 393 теңге) тіркелді. Астана (1 193 186 теңге) мен Алматы (1 094 752 теңге) қымбат өңірлер қатарында. Ұлытауда қарызға кететін шығын да ең жоғары – 275 394 теңге (19%). Қызылорда облысында азық-түлік шығыны (556 804 теңге) мен қарыз жүктемесі (129 014 теңге) жоғары, ал Шымкентте қарыз шығыны ең төмен (12 708 теңге).
Қала мен ауыл
Қалалықтар орташа 1 044 288 теңге, ауылдықтар 975 766 теңге жұмсайды. Қалалықтардың шығыны қызметтер мен тауарларға, ауылдықтардікі азық-түлікке (537 083 теңге) бағытталған. Дегенмен, Алматы және Қызылорда облыстарында ауылдықтардың шығындары қалалықтардан жоғары.
2025 жылдың I тоқсанымен салыстырғанда
Азық-түлік шығындары 50,1%-дан 52%-ға өскен, бірақ жалпы құрылым өзгеріссіз. Оңтүстік өңірлерде маусымдық өнімдердің арзандығы шығындарды азайтқан.
