Фото: Улысмедиа
Қазақстанда 2050 жылға қарай зейнеткерлер саны артып, жастар азаятыны белгілі. Бұл зейнетақы жүйесіне үлкен жүк түсіреді. Сол себепті болашақтағы қаржылық тұрақтылық үшін қазіргі кезде зейнетақы жинағын көбейту маңызды болып отыр, деп жазды qandastar.kz
Зейнетақы төлемдері бұрынғы жалақының белгілі бір пайызынан төленеді. Халықаралық еңбек ұйымы бойынша, бұл көрсеткіш кем дегенде 40% болуы тиіс. Дамыған елдерде орташа көрсеткіш 60%-ға жуық. Қазақстанда бұл мөлшер 2024 жылы шамамен 41% болды.
Қазақстандағы зейнетақы жүйесі бірнеше бөліктен тұрады: мемлекеттен берілетін базалық және ынтымақты зейнетақы, сондай-ақ жеке жинақтаушы зейнетақы қорлары (міндетті және ерікті жарналар). Бірақ 2040 жылдан кейін көп адамдарда ынтымақты зейнетақы болмайды, сондықтан жеке жинақтардың маңызы артады.
Халықтың қартаюы мен туу көрсеткішінің төмендеуі салдарынан еңбекке жарамды адамдар саны азаяды, ал зейнеткерлер саны көбейеді. Бұл жағдай зейнетақы жүйесіне ауыр салмақ түсіреді.
Сондықтан әр азаматтың зейнетақы қорына көбірек және тұрақты ақша аударуы қажет. Инвестициялық кірістер зейнетақы жинағын көбейтуге мүмкіндік береді: біздің елде зейнетақы активтерінің шамамен 40%-ы инвестициялар есебінен қалыптасады.
Зейнетақыны жоспарлау – маңызды қадам. Қазақстанда арнайы калькуляторлар мен жеке зейнетақы жоспарлау құралдары бар. Олар көмегімен өзіңіздің болашақтағы зейнетақыңызды есептеп, қажетті жарналарды белгілей аласыз.
Сонымен қатар, ерікті зейнетақы жарнасын салып, жинақты арттыруға болады. Бұл жарналар жеке немесе жақын адам шотына аударылуы мүмкін. Қосымша жарналар салықтық жеңілдіктерге ие.
Салымшылар өз жинақтарын инвестициялау арқылы да көбейте алады. Бұл ақшаны тек сақтау емес, оны көбейтуге мүмкіндік береді.
