Жуырда Үкімет дағдарысқа қарсы шаралардың бірі ретінде жанар-жағармай бағасына шектеуді енгізді, деп хабарлайды Qandastar.kz. Осыған орай Энергетика министрлігі жанар-жағармай бағасын көтеруге уақытша мораторий енгізу механизмін түсіндірді.
Министрлік мораторийдің негізгі қағидаты АИ-92 маркалы бензин мен дизель отынының бөлшек сауда бағасын 16 қазандағы әрбір нақты жанармай құю станциялары тізбегіндегі қолданыстағы деңгейде бекіту екенін атап өтті.
Алайда ел бойынша бірыңғай шекті бағаны енгізу қарастырылмаған.
Қазір ірі жанармай құю бекеттеріндегі баға диапазоны АИ-92 маркалы бензиннің литріне 213 теңгеден 239 теңгеге дейін, дизельдік отынның литріне 317 теңгеден 337 теңгеге дейін.
16 қазанда энергетика министрлігі бәсекелестікті қорғау және дамыту агенттігімен бірлесіп, ірі жанармай құю станциялары желілері мен көтерме жеткізушілермен кездесу өткізді. Компания басшыларына бағаның одан әрі көтерілуіне жол бермеу туралы үкіметтің шоғырландырылған және берік ұстанымы туралы хабардар етілді.
