Ақтөбе қаласында 8-сыныпта оқитын жасөспірім әкесінің көлігін рұқсатсыз айдап шығып, апатқа ұшырады, деп хабарлайды qandastar.kz. Оқиға «Бауырластар» тұрғын ауданында болған.
Полицияның алдын ала мәліметінше, оқушы көлікті басқара алмай, жол-көлік оқиғасына себеп болған. Алған ауыр жарақаттарының салдарынан ол ауруханада көз жұмды.
Бұл — соңғы екі айда дәл осы ауданда болған екінші қайғылы жағдай. 2 қыркүйекке қараған түні де 16 жастағы жасөспірім ата-анасының Mitsubishi Carisma маркалы көлігін рұқсатсыз айдап шығып, апатқа ұшыраған. Ол да алған жарақатынан қайтыс болған еді.
Осыған байланысты Ақтөбе облысының Полиция департаменті ата-аналарға балаларының әрекеттеріне мұқият болуды және олардың көлік құралдарына қол жеткізуін шектеуді ескертті.
Полиция мәліметінше, биыл өңірде 1 632 жол-көлік оқиғасы тіркеліп, соның салдарынан 2 мыңнан астам адам жарақат алып, 99 адам қаза тапқан. Құрбандардың арасында кәмелетке толмағандар да бар.
Қазір облыс аумағында «Қауіпсіз жол» жедел-профилактикалық шарасы өтіп жатыр (27–31 қазан аралығы). Оның басты мақсаты — жол қозғалысы қауіпсіздігін қамтамасыз ету және балалар мен жаяу жүргіншілер арасындағы апаттардың алдын алу.
