Сеул қаласындағы әйгілі Kkanbu Chicken мейрамханасында күтпеген жомарттық оқиғасы орын алды, деп хабарлайды qandastar.kz.
Әлемге танымал үш миллиардер – Nvidia компаниясының бас директоры Дженсен Хуан, Samsung Electronics төрағасы Ли Чжэ Ён және Hyundai Motor Group жетекшісі Чон Ый Сун бірге кешкі асқа келіп, мейрамханада отырған барлық қонақтардың есебін төлеп кеткен.
Олар Кореяда кең таралған “чимэк” дәстүрін – қуырылған тауық пен сыраның үйлесімін – бірге дәмін тату үшін бас қосқан. Куәгерлердің айтуынша, Хуан “алтын қоңырауды” шалып, барлығы үшін ақы төлейтінін білдірген. Дегенмен, жергілікті ақпарат құралдары нақты есепті Samsung басшысы өтегенін, ал Hyundai төрағасы қосымша тапсырысты өзі жапқанын хабарлады.
Үштік кеш бойы ірімшік шариктері мен сүйексіз қуырылған тауыққа тапсырыс беріп, оны Terra маркалы корей сырасымен және дәстүрлі соджу ішімдігімен ішкен. Кейін олар сыртқа шығып, жиналған жұртқа ірімшік таяқшалары мен тауықтан дәм таттырған.
Бұл бейресми кездесу АТЭС саммиті қарсаңында өтті. Келесі күні Дженсен Хуан Оңтүстік Корея президентімен кездесіп, Nvidia компаниясы жергілікті технологиялық алыптарға – Samsung, Hyundai, Naver және SK – 260 мыңнан астам графикалық процессор жеткізетінін мәлімдеді.
Президент әкімшілігінің мәліметінше, бұл серіктестік жасанды интеллектке негізделген автономды көлік жүйелерін дамыту мен “физикалық ЖИ” технологиясын жетілдіруге бағытталған.
