Қазақстан экономикасы 2025 жылдың қаңтар-қазан айлары аралығында 6,4 пайыз өсім көрсетті. Бұл – жоғары көрсеткіш, алайда сарапшылардың айтуынша, маңыздысы – өсімнің қарқыны емес, оның сапалық сипаты. Ел біртіндеп шикізаттық тәуелділіктен арылып, өндіріс, өңдеу, көлік және құрылыс салаларына сүйенген жаңа экономикалық құрылым қалыптастырып келеді, деп жазды qandastar.kz
Президент атап өткен «сапалы өсу» ұғымы дәл осы үрдіске сәйкес келеді: енді елдің тұрақтылығы сыртқы нарыққа емес, ішкі мүмкіндіктер мен тиімді ұйымдастыруға негізделіп отыр. Экономика сыртқы конъюнктураның ықпалынан біртіндеп тәуелсізденіп, өздігінен тұрақтылық қалыптастыру сатысына өтуде.
Соңғы айларда өнеркәсіп пен көлік салалары экономикалық өсімнің негізгі қозғаушы күші болды. Өнеркәсіп көлемі 7,3 пайызға артып, жалпы ішкі өнімнің үштен бірін қамтамасыз етті. Сауда және көлік секторларымен бірге бұл салалар экономикалық өсімнің 70 пайыздан астамын құрады. Өңдеу өнеркәсібінде де серпін жоғары: машина жасау 11,5 пайызға, химия өнеркәсібі 10,9 пайызға, азық-түлік өндірісі 9,1 пайызға, мұнай өңдеу 6,3 пайызға, металл бұйымдары өндірісі 14,1 пайызға, ал құрылыс материалдары 5,3 пайызға өсті. Бұл деректер экономикалық өсімнің жаңа – өндірістік негізін қалыптастырып жатқанын айғақтайды.
Құрылыс саласы да тұрақты даму үстінде. Оның көлемі 15,1 пайызға артқан. Бұл бір реттік серпін емес, инфрақұрылымға, тұрғын үйге және қалалық ортаға бағытталған жүйелі инвестициялардың нәтижесі. Өңірлер де белсенді дамып келеді: жергілікті жобалар бизнес пен жұмыспен қамтуды жандандырып, ішкі сұранысты күшейтуде.
Ауыл шаруашылығы да біртіндеп технологиялық әрі ұйымдастырушылық тұрақтылыққа қол жеткізуде. Саладағы өсім 5,4 пайызды құрап, өсімдік шаруашылығында 6,7 пайызға, мал шаруашылығында 3,4 пайызға артты. Ең жоғары өнімділік Ақмола, Қостанай және Павлодар облыстарында тіркелді. Сүт өндірісі 5,2 пайызға, ет – 2,8 пайызға, ал жұмыртқа – 1,4 пайызға өскен. Бұл көрсеткіштер агросектордың жаңа деңгейге көтерілгенін көрсетеді.
Сауда және көлік салалары жалпы экономикалық белсенділіктің айнасы болып отыр. Сауда айналымы 9 пайызға артса, көлік секторы 20,7 пайыздық өсім көрсетіп, барлық бағыттағы тасымал көлемін ұлғайтты. Бұл – ішкі логистиканың жандануын және өңірлік байланыстың нығаюын білдіреді.
Жалпы алғанда, Қазақстан экономикасы бұрынғыдай сыртқы шикізат нарықтарына емес, ішкі өндіріс пен адами капиталға сүйенетін жаңа даму траекториясына көшіп келеді. Өңірлердің белсенділігі, инфрақұрылымдық жобалардың артуы және технологиялық жаңару елдің экономикалық тұрақтылығын күшейтуде.
Бүгінгі экономикалық модель бір сәттік серпінге емес, ұзақ мерзімді және болжамды өсімге бағытталған. Бұл бағыт – елдің болашағына сенім мен берік экономикалық негіз қалыптастырудың басты шарты.
