Мәжіліс депутаты Бакытжан Базарбек қарыз алушыларды идентификациялау ережелерін қатаңдататын заң жобасын ұсынғаннан кейін қаржы секторы тарапынан қысым көріп жүргенін айтты. Бұл туралы qandastar.kz ақпарат порталы Finratings.kz-ке сілтеме жасап хабарлайды.
Instagram-да жариялаған видеода Базарбек өзін халықаралық парламенттің этикалық кеңесіне шақыртқанын жеткізді. Айтуынша, кеңеске түсірілген шағымды Қазақстан қаржыгерлерінің қауымдастығы жолдаған.
«Бұл шағымның артында екінші деңгейлі банктер тұр деп ойлаймын. Оларға Мұрат Әбенов екеуіміз ұсынған өзгерістер ұнамады», — деді депутат.
Оның сөзінше, түзетулер тіркелгеннен кейін оған қарсы «тыныш кампания» басталған. Мақсат — ұсынылған нормаларды қайта қарату немесе банктерге айтылған сынның бетін қайтару.
Инициаторлар 20-дан астам өзгерісті қамтитын пакет әзірлеген. Ең негізгісі — қарыз алушылардың биометриялық идентификациясын екінші деңгейлі банктерден алып, Ұлттық банктің Деректерді өңдеу орталығына көшіру.
Қазір тексеруді банктердің өзі жүргізеді.
Депутаттың айтуынша, ұсыныстар алаяқтық мүмкіндіктерін шектейді, ашықтықты арттырады және банктерге қосымша талаптар қояды.
«Заң халықты қорғаса, бұл бұрын басқаша жұмыс істеп үйренгендерге ұнамайды», — деді Базарбек.
Ол сондай-ақ несие алаяқтықтарында кінә дропперлерде ғана емес, бақылауды әлсіз жүргізетін қаржы ұйымдарында да екенін атап өтті.
