Қазақстанда мемлекеттен баспана алуға үміткер 642 мың азамат тіркелген. Алайда, олардың басым бөлігінің деректері ескірген болып шықты. Бұл туралы «Отбасы банк» басқарма төрайымы Ләззат Ибрагимова мәлімдеді, деп хабарлайды qandastar.kz сайты naryk.kz-қа сілтеме жасап.
Ләззат Ибрагимованың айтуынша, кезекте тұрғандардың тек 14 пайызы, яғни 92 092 адам ғана өз деректерін жаңартуға келісім берген. Қалғандары талаптарға сай келмейтіндіктен немесе критерийлерді орындамайтындықтан кезектен шығарылуда.
642 мың кезекте тұрғандар туралы деректерді алған кезде, ешкім инвентаризация жүргізбегенін, яғни кезекте тұрғандар тізімі тек нөмірлері мен ЖСН бойынша берілгенін білдік, бірақ мәселе одан да тереңдеп кетті. Бізде актуалды телефон нөмірлері жоқ, адамдардың тіркеуі туралы, отбасы құрамы туралы мәліметтер сәйкес келмейді, – деді ол.
Банк жүргізген тексеру барысында көптеген азаматтың:
- телефон нөмірі жарамсыз екені,
- тұрғылықты мекенжайы сәйкес келмейтіні,
- отбасы құрамы бойынша мәліметтері дұрыс емес екені анықталған.
Сонымен қатар, бірқатар адамның жеңілдік санатынан (мемлекеттік қызметші, әскери қызметкер және т.б.) шығып қалғаны белгілі болды. Кейбірінің балалары кәмелетке жетіп кеткен, енді біреуінің отбасы мүшесі баспана сатып алған.
«Көпшілігі өздерінің енді талапқа сай келмейтінін түсінгендіктен, деректерін жаңартуға келісім бермей жатыр. Бірақ дәл сол адамдар кезектің алға жылжуына кедергі келтіріп отыр», – деді Ләззат Ибрагимова.
2025 жылдың 8 желтоқсанынан бастап жаңа ереже енгізілді: егер азамат өзінің жеке деректерін өңдеуге келісім бермесе, жүйе оны айналып өтіп, келесі жылдағы (мысалы, 2007 жылдан кейін 2008 жылғы) кезектегілерге көшуге мүмкіндік алады. Өйткені бұған дейін жүйе келісім бермеген бір адамға байланысты бүкіл процесті тоқтатып қоюға мәжбүр болған еді.
