Америкалық боксшы Райан Гарсия бұған дейін Геннадий Головкинге қатысты қатаң пікір білдіргеніне қарамастан, допинг дауына іліккен қазақстандық Жәнібек Әлімханұлын күтпеген жерден қолдады, деп жазады qandastar.kz.
Гарсияның айтуынша, тыйым салынған зат Әлімханұлының ағзасына тағамдық қоспалар арқылы түсуі мүмкін, ал боксшының өзі бұл туралы білмеуі ықтимал.
«Мен мұны көп адамнан жақсырақ түсіндіре аламын деп ойлаймын, өйткені өзім де бір кездері өмірімде ешқашан допинг қолданбасам да, оң нәтиже көрсеткенмін. Тағамдық қоспалардың ластануы — өте өзекті мәселе. Бұл нақты осы жағдай деп айта алмаймын, бірақ Сабриэль Матиаспен де осындай жайт болғанына сенімдімін. Остарин — ең көп кездесетін сапасыз қоспалардың бірі. Оның нақты қандай заттан тесттен өтпей қалғанын білмеймін — мельдоний ме, әлде басқа бірдеңе ме. Соңы немен аяқталатынын көрейік», — деді Гарсия.
Еске сала кетейік, бұған дейін Райан Гарсия Геннадий Головкин Халықаралық бокс даңқ залының үміткерлер тізіміне енуге лайық емес деп мәлімдеген болатын. Кейін ол қазақстандық жанкүйерлерден кешірім сұрағанымен, өз пікірін өзгертпегенін атап өтті.
