Ұшақ салонында түтін шығып, ол шұғыл қонуға мәжбүр болды, деп хабарлайды qandastar.kz порталы Көлік министрлігіне сілтеме жасап.
Оқиға 17 желтоқсанда Астана уақыты бойынша сағат 07:38-де болған.
«Алматы – Астана бағыты бойынша КС-851 тұрақты жолаушылар рейсін орындау барысында «Эйр Астана» АҚ-ның пайдалануындағы Airbus A321N EI-KDG әуе кемесімен авиациялық оқиға орын алды.
«Қазаэронавигация» РМК Әуе қозғалысын жоспарлаудың бас орталығы ұсынған ақпаратқа сәйкес, әуе кемесінің салонында түтін пайда болуына байланысты экипаж MAY-DAY апаттық сигналын жариялаған», — делінген мәлімдемеде.
Алдын ала мәлімет бойынша жолаушылар мен экипаж мүшелері арасында зардап шеккендер жоқ.
Ұшақ сағат 07:40-та қонды.
Қауіпсіздікті қамтамасыз ету мақсатында Алматы қаласы әуежайының өртке қарсы және авариялық-құтқару қызметі жұмылдырылды.
Оқиғаның мән-жайын Көліктегі оқиғалар мен оқыс оқиғаларды тергеп-тексеру департаментінің қызметкерлері анықтап жатыр.
