Белгілі режиссер Ақан Сатаевтың бұрынғы жұбайы Назира Бакаева олардың ажырасуына не себеп болғанын алғаш рет ашық айтты. Ол Qysqa Söz YouTube-арнасына берген сұхбатында некедегі басты шиеленіс нүктелерінің бірі актриса Алмира Тұрсын болғанын мәлімдеді. Актриса «Томирис» фильмінде басты рөлді сомдаған, деп жазады qandastar.kz.
Назира Бакаеваның айтуынша, бұл жағдай олардың қарым-қатынасына айтарлықтай әсер еткен.
«Иә, қазір аудитория үшін ашық мойындай аламын: бұл — ажырасуымыздың негізгі себептерінің бірі болды», — деді ол.
Сонымен қатар ол көпәйелділікті қабылдай алмағанын атап өтті. Мұсылман болғанына қарамастан, діни қағидаларды жоққа шығармайтынын, бірақ өзі үшін мұндай өмір салтына дайын емес екенін шынайы мойындағанын айтты.
Дегенмен Назира Бакаева Ақан Сатаевты әке әрі тұлға ретінде жоққа шығармайтынын жеткізді. Оның сөзінше, режиссер жауапты ұл, күйеу болған және қазір де балаларына қамқор әке ретінде белсенді араласып жүр. Балалардың әкесімен бірге тұруы — олардың ортақ әрі саналы шешімі болған.
Сұхбат барысында Назира кейбір уағдаластықтардың әлі күнге дейін орындалмағанын да айтты. Бұл мәселе ол үшін әлі де ауыр тақырып болып отырғанымен, сабыр сақтап, тыныштықты таңдауға тырысатынын жеткізді.
