2025 жылғы 8 желтоқсанда ҰҚК-нің Сыбайлас жемқорлыққа қарсы қызметі Шығыс Қазақстан облысының жолаушылар көлігі және автомобиль жолдары басқармасының басшысы Данияр Уахитовты ұстады. Оған аса ірі көлемде пара алды деген күдік келтірілуде. Бұл туралы Qandastar.kz ақпарат порталы База компромата басылымына сілтеме жасап хабарлайды.
Ұсталу сәтінде лауазымды тұлғадан 170 миллион теңге және 300 мың АҚШ доллары көлемінде ақша тәркіленген. Қазіргі уақытта Данияр Уахитовқа қатысты сотқа дейінгі тергеп-тексеру жүргізіліп жатыр. Қылмыстық іс аясында шамамен 15 адамның аты аталып, олардың тергеу органдарына куәлік беріп жатқаны хабарланды.
Істе өңірдегі жоғары лауазымды тұлға — ШҚО әкімі Нұрымбет Сақтағановтың есімі де аталады. Ресми емес деректерге сүйенсек, Данияр Уахитов ұзақ уақыт бойы облыс әкімінің сенімді басқарушыларының бірі ретінде қарастырылған және оның тапсырмаларын орындаған тұлғалар қатарында болған.
Айтылған мәліметтерге сәйкес, Уахитов белгілі бір басқарушылық және бейресми келісімдер кезінде байланыстырушы буын рөлін атқарған, сондай-ақ қаржылық қаражаттардың жинақталуы мен берілуіне қатысы болуы мүмкін деген болжам бар. Істе аталған өзге тұлғалардың да Сақтағановпен қызметтік байланысы болғаны талқылануда.
Назар аударарлық жайт — Данияр Уахитовтың басқарма басшысы қызметіне тағайындалуы Нұрымбет Сақтағановтың облыс әкімі қызметіне кіріскенінен төрт ай өткен соң жүзеге асқан. Ол бұған дейін аудан әкімінің орынбасары қызметін атқарып, қысқа уақыт ішінде облыстық деңгейдегі лауазымға көтерілген.
Сонымен қатар, 2016–2020 жылдары Сақтағанов пен Уахитовтың қызмет жолдары бұрын да тоғысқаны белгілі. Ол кезеңде Нұрымбет Сақтағанов Ұлан ауданының әкімі, ал Данияр Уахитов осы ауданға қарасты Таврия ауылдық округінің әкімі қызметін атқарған.
Қолданыстағы заңнамаға сәйкес, аталған барлық тұлғалар сот үкімі заңды күшіне енгенге дейін кінәсіз деп есептеледі. Дегенмен, көрсетілген деректер жиынтығы тергеу барысында қосымша назарға алынуы мүмкін бірқатар сұрақтарды туындатып отыр.
