Әлеуметтік желілерде Өзбекстанның мәдениет министрі Озодбек Назарбековтың тойда ән айтып, қонақтардан ақша алып жатқан сәті түсірілген видео тарады. Ол — үкімет мүшесі ғана емес, сонымен қатар халық әртісі. Бұл туралы Qandastar.kz порталы Protengekz Telegram арнасына сілтеме жасап хабарлайды.
Бұл жағдайға қатысты Мәдениет министрлігі пікір білдіріп, той үстінде ақша алу «ұлттық салт-дәстүр мен құндылықтардың бір бөлігі» екенін мәлімдеді. Алайда Өзбекстанның Сыбайлас жемқорлыққа қарсы органы бұл пікірмен келіспей, аталған әрекет мемлекеттік қызметшілердің этикасы мен мінез-құлық қағидаларын бұзады деп санайды.
Қазіргі таңда бұл дауда кімнің уәжі дұрыс екені жөнінде түпкілікті шешім қабылданған жоқ. Дегенмен қоғамда кең көлемде пікірталас басталды. Сарапшылардың пікірінше, дәл осындай ашық талқылаулар арқылы ұлттық деңгейде этикалық стандарттар қалыптасады.
