Қазақстандық блогер Мадинахон Мамадалиева, желіде Мадлен атымен танымал, Instagram парақшасында өзіне жасалған күтпеген ұсыныс туралы айтып берді, деп жазады qandastar.kz.
Оның айтуынша, бір ер адам оған екінші әйел — тоқал болуды ұсынған.
Оқырмандары блогерден: «Егер блог жүргізбегенде немен айналысар едіңіз?» деп сұраған. Мадлен әзіл ретінде:
«Әрине, тоқал болар едім! Әзіл ғой», — деп жауап берген.
Алайда кейінірек ол мұндай ұсыныстың шын мәнінде болғанын айтты. Блогердің айтуынша, ұсынысты Қазақстаннан тыс жерде тұратын, бұрыннан таныс ер адам жасаған.
«Жақында бір ер адам маған екінші әйел болуды ұсынды. Біз бір-бірімізді өте ұзақ уақыттан бері танимыз. Ол ауқатты, жасы да үлкен емес», — деді Мадлен.
Оның сөзінше, ұсыныс шартында жылына 1 миллион доллар көлемінде махр қарастырылған.
«Бұл әзіл емес еді. Бірақ мен бас тарттым. Екінші орында болу – менікі емес. Мен бұдан да жақсысына лайықпын», — деп атап өтті блогер.
