ASTANADA TAZALYQ ESTAFETASYNA 35 MYŃ ADAM QATYSTY

Astana turǵyndary Naýryznamanyń sońǵy kúninde belgilengen «Tazarý» ekologııalyq akııasyna bir kisideı jumyldy

«Astana jastary» volonterler jelisi búgin Kóktal saıabaǵynda senbilik uıymdastyryp, qarııalardyń aýlalaryn qardan tazalaýǵa bolysty.  Tańmen talasa bir top erikti Saryarqa aýdanynda ornalasqan Kóktal saıabaǵyna keldi. Astanalyq kolledj ben joǵary oqý oryndarynyń stýdentteri jol jıekteri men sport alańyn qardan tazartýǵa bilek sybana kiristi. Perızat Ábilova, volontıor: — Biz Naýryznamaǵa oraı Astana jastary volonterlarymen birge qalamyzdy qardan tazartýǵa shyqtyq. Sonymen qatar biz múmkindigi shekteýli adamdarǵa, qart adamdarǵa kómektesýge baramyz. Jumys isteý bizge ońaı bolyp jatyr. Biz 15 shaqty adam bolyp kelip otyrmyz. Akııa kezinde aryqtar da qar men qoqystan tazardy. Al kommýnaldyq qyzmet jumysshylary úıilgen qardy bir demde arnaıy polıgonǵa shyǵardy. Jalpy «Tazarý» kúnine belgilengen senbilik shahardyń barlyq kóshe, saıabaqtarynda uıymdastyryldy. Saryarqa aýdanynan 3200-deı adam belsendilik tanytqan.

Erjan Jumaǵulov, «Saryarqa» aýdany ákiminiń orynbasary: — Búgin osy akııa aıasynda jalǵyzbasty zeınetkerlerdiń úıleriniń aýlasynan qardy tazalaımyz. Sonymen qatar aýdandardan 270-ten astam arnaıy tehnıka, 645 jol jumyskerleri jumyldyrylǵan. Astanalyq turǵyn úı keshenderinde de tazalyq sharasy ótti. Kommýnaldyq qyzmetter aıaldama pavılondary men kópirlerdi jýýǵa kiristi. Bas shahardaǵy «Tazalyq estafetasyna» 35 myńdaı adam jumylǵan. Olardyń qatarynda volonterler men kásipkerler de boldy.