Республикалық референдумға қатысты exit poll нәтижелері жарияланды, деп хабарлайды qandastar.kz порталы.
«Еуразиялық интеграция институты» зерттеу компаниясы «Хабар» агенттігінің тапсырысы бойынша жүргізген exit poll нәтижесіне сәйкес, референдумға қатысқан азаматтардың 86,7%-ы Конституцияға ұсынылған өзгерістерді қолдаған.
Зерттеу Қазақстанның 17 облысында, сондай-ақ Астана, Алматы және Шымкент қалаларында өтті. Сауалнама референдум учаскелерінен шыққан азаматтар арасында жүргізілген.
Exit poll 200 референдум учаскесін қамтыды. Оның ішінде 129-ы қалаларда, 71-і ауылдық елді мекендерде орналасқан. Жалпы зерттеуге 30 мың респондент қатысқан.
Сауалнама арнайы дайындықтан өткен интервьюерлер тарапынан face-to-face (бетпе-бет) әдісі арқылы жүргізілді. Зерттеу нәтижесінің қателік шегі 1%-дан аспайды. Күні бойы 7 сауалнама кезеңі өткізілген.
Респонденттерге: «Жаңа Конституцияны қабылдайсыз ба?» деген сұраққа қандай жауап нұсқасын таңдадыңыз?» деген сұрақ қойылған.
Сонымен қатар, «СОЦИС-А» кешенді әлеуметтік зерттеулер институты жүргізген exit poll нәтижесіне сәйкес, дауыс берген қатысушылардың 87,4%-ы жаңа Конституция жобасында қарастырылған өзгерістерді қолдайтынын айтқан.
Ал «AMANAT» партиясының Қоғамдық саясат институты өткізген exit poll қорытындысы бойынша, референдумға қатысып, дауыс берген азаматтардың 88,6%-ы жаңа Конституцияны қолдаған.
