Қазақстанда білім беру жүйесін жаңарту аясында алдағы жылдарға арналған оқулықтарды кезең-кезеңімен жаңарту жоспары ұсынылды. Бұл туралы 2026 жылғы 18 наурызда өткен Үкімет отырысында білім министрі Жұлдыз Сүлейменова мәлімдеді.
Министрдің айтуынша, 2026 жылы 3, 4, 7, 8 және 9 сыныптарға арналған оқулықтар жаңартылатын болады. Ал 2027 жылы 1 және 5 сыныптарға жаңа оқулықтар енгізіліп, 10-11 сыныптарға арналған оқу материалдары толықтай өзектендіріледі, соның ішінде карталар мен тарихи-әкімшілік деректер жаңартылады. 2028 жылы 2 және 6 сынып оқушыларына арналған жаңа оқулықтар жарық көреді.
Жаңа тәсіл оқушылардың білім сапасын арттырып, олардың аналитикалық және ғылыми ойлау қабілеттерін дамытуға, сондай-ақ заманауи экономика талаптарына сай дағдыларды қалыптастыруға бағытталған. Бұл өз кезегінде еліміздің технологиялық тұрғыдан дамыған ұлт қалыптастыру мақсатын жүзеге асыруға мүмкіндік береді.
Сонымен қатар техникалық және кәсіптік білім беру саласын дамытуға ерекше көңіл бөлінеді. Бұл бағытта теориялық білім мен тәжірибелік дағдыларды ұштастыратын дуальды оқыту жүйесін жетілдіру көзделіп отыр.
Білім сапасын арттыру мақсатында барлық деңгейде кешенді шаралар қолға алынады. Тәрбие жұмысы да күшейтіліп, 5-9 сыныптарға арналған «Адал Азамат» бірыңғай бағдарламасы, «Конституция негіздері», «Заң мен тәртіп» пәндері, сондай-ақ экологиялық білім беру енгізіледі. Бұл бастамалар оқушылардың азаматтық жауапкершілігін, патриоттық сезімін және әлеуметтік-экологиялық құзыреттерін дамытуға бағытталған.
