Белгілі әнші Нұржан Керменбаев “ҚызықTimes” бағдарламасына қонақ болып, тыңдармандарымен шығармашылығы мен жеке қасиеттері туралы әңгімеледі. Кешті ол өзінің көпшілік сүйетін «Сенен басқа» әнімен ашты. Бұл туралы Qandastar.kz сайты Nur.kz порталына сілтеме жасап хабарлады
Әнші алдағы уақытта көрермендерін жаңа туындыларымен қуантатынын айтты. Оның сөзінше, оннан аса жаңа ән дайындалуда, соның ішінде дуэттер де бар. Жаңа музыканттар мен композиторлармен жұмыс істеп, әр әнге ерекше көңіл бөлетінін жеткізді. Нұржан өзіне тән перфекционизм қасиетін атап өтіп, шығармашылық үшін ми тыныштығы маңызды екенін айтты.
Бағдарлама барысында әнші өз шляпасының орнына кепка киюге неге көшкенін, кино түсіру тәжірибесі мен Super Star жобасындағы жеңіс сәттерін бөлісті. Сонымен қатар, көрермендерге “Жаным-арманым”, “Мың сұрақ”, “Ерекше” және “Жылайды жүрек” сияқты әндерін орындап, студиядағы атмосфераны жылы етіп, музыкалық ностальгия сыйлады.
Нұржан сондай-ақ Қазыбек Құрайышты мақтап, өзінің әндеріне жасалатын каверлерге деген көзқарасын айтып, арнайы сый ретінде Ғаділбек Жанайдың “Есте сақта” әніне кавер орындады.