Астана қаласында полиция департаментінің бастығы Марат Төлебаев қала тұрғындарымен есептік кездесу өткізді, деп хабарлайды Qandastar.kz. Іс-шараға белсенді азаматтар қатысып, қоғамдық қауіпсіздік пен құқықтық тәртіп мәселелері бойынша мазмұнды пікір алмасу өтті.
Кездесу барысында департамент бастығы 2025 жылғы жұмыс нәтижелері мен қазіргі криминогендік ахуал туралы ақпарат берді. Ұрлық, тонау, бұзақылық және бопсалау сияқты қылмыстардың азайғаны, ал қылмыстарды ашу деңгейінің артқаны атап өтілді. Қалада 200 мыңнан астам бейнебақылау камерасы жұмыс істейді, олардың төрттен бірі жедел басқару орталығына біріктірілген, осы арқылы шамамен 3 мың қылмыс ашылған. Жүйе кезең-кезеңімен заманауи цифрлық камераларға жаңартылып жатыр.
Қоғамдық қауіпсіздікті күшейту үшін “Цифрлық күмбез” жобасы іске асырылуда, сондай-ақ тұрғындардан келетін хабарламалар мен қоғамдық көмекшілердің қатысуы маңызды екені айтылды. Сонымен қатар кәмелетке толмағандарды құқыққа қарсы әрекеттерге тарту мәселесіне ерекше назар аударылады, профилактикалық жұмыстар күшейтіледі.
Департамент бастығы ашықтық қағидатына ерекше мән беретінін, тұрғындарды жеке қабылдау мен кез келген өтінішті бақылауда ұстайтынын жеткізді. Мұндай кездесулер полиция мен халық арасындағы сенімді нығайтып, қаланы қауіпсіз әрі жайлы етуге септігін тигізеді.
Ақпарат көзі: Polisia.kz.
