28 наурызда Қазақстан тағы да әлемдік экологиялық бастаманың бір бөлігі болады – «Жер сағаты» акциясы өтеді, деп хабарлайды Qandastar.kz Қазақстан Экология және табиғи ресурстар министрлігіне сілтеме жасап.
Жергілікті уақыт бойынша сағат 20:30-да үйлерде, кеңселерде және көшелерде жарық бір сағатқа сөнеді.
«Жер сағаты» – Дүниежүзілік жабайы табиғат қорының (WWF) ұйымдастыруымен өткізілетін жыл сайынғы халықаралық акция. Оның мақсаты – әрбір адамды планетаның болашағына жауапкершілікпен қарауға шақыру, электр энергиясын үнемдеуге назар аударту. Әлемнің ең танымал ғимараттары мен ескерткіштерінің жарығы да акция кезінде өшеді.
Бүкіл әлем бойынша 2 млрд-тан астам адам, 180 елдің 7 000 қаласының тұрғындары акцияға қатысады. 2026 жылы акция 19-шы рет, ал Қазақстанда 17-ші рет өткізіледі.
Елдегі акция кезінде жарық өшірілетін негізгі нысандардың қатарында:
- «Бәйтерек» монументі
- «Астана Опера»
- Әзірет Сұлтан мешіті
- Тәуелсіздік Сарайы
- «Астана Арена» стадионы
- «Алау» мұз айданы
- «Қазақстан» қонақ үйі
- әл-Фараби атындағы ҚазҰУ
Қатысқыңыз келсе, 28 наурызда сағат 20:30-да шамдар мен электр құралдарын бір сағатқа өшіріңіз.
