Футболдан ФК Атырау клубы төртінші рет сатылымға шығарылды. Бұған дейінгі үш сауда әрекеті нәтижесіз аяқталып, клуб жаңа иесін таба алмады. Бұл туралы Qandastar.kz сайты Stan.kz агенттігіне сілтеме жасап хабарлады.
Алғашқы аукцион 2026 жылдың 17 ақпанында өтіп, клубтың бағасы 250,8 миллион теңге болған. Кейін баға бірнеше рет төмендетілгенімен, сатып алушылар табылмады. Соңғы, үшінші саудада клуб 125,4 миллион теңгеге бағаланғанымен, бұл жолы да өтінімдер болмады.
Енді кезекті, төртінші сауда 17 сәуірге жоспарланып отыр. Бұл жолы клубтың 100% үлесі 75,2 миллион теңгеге ұсынылуда, яғни бастапқы бағадан 3,3 есе арзан. Саудаға қатысу үшін 37,6 миллион теңге көлемінде кепілдік жарна талап етіледі.
Клубтың нарықтық құны 250,8 миллион теңге деп бағаланған және қазіргі уақытта ол мемлекет меншігінде. Болашақ иесіне бірқатар талаптар қойылған. Соның ішінде үш жыл ішінде кемінде 1 миллиард теңгеге футбол академиясына арналған спорт кешенін салу міндеті бар. Сонымен қатар стадион мен жаттығу базасын күтіп ұстау, жастарды дамыту және командалардың тұрақты жұмысын қамтамасыз ету талап етіледі.
Жаңа иесі клубтың Қазақстан чемпионатына қатысуын қамтамасыз етіп, ерлер, әйелдер және қосалқы құрамдарда кемінде 25 ойыншыдан болуы тиіс. Сондай-ақ клуб қызметі ашық жүргізіліп, қаржылық есептер жыл сайын аудиттен өтіп отыруы қажет.
Айта кетейік, бұған дейін Қазақстанда басқа да футбол клубтары электронды сауда арқылы сатылған. Мысалы, Шахтер Қарағанды, ФК Актобе және ФК Туран клубтары жаңа иелерін тапқан.
