جاڭالىقتار
شەتەلدەن كەلگەن قانداستارعا ازاماتتىق الۋ جەڭىلدەيدى
ەڭبەك جانە حالىقتى الەۋمەتتىك قورعاۋ مينيسترلىگى جىل سايىن قازاقستانعا ەڭ كەمى 20 مىڭ ورالمان كەلەدى دەپ جوسپارلاپ وتىر
ەڭبەك جانە حالىقتى الەۋمەتتىك قورعاۋ مينيسترلىگى شەتەلدە تۇراتىن ەتنيكالىق قازاقتاردى اتاجۇرتىنا قايتارۋ ءۇشىن ازاماتتىق الۋ ءتارتىبىن جىلدامداتۋ جانە جەڭىلدەتۋدى جوسپارلاپ وتىر. بۇل تۋرالى بۇگىن حالىققا ەسەپ بەرۋ كەزدەسۋىندە ۆەدومستۆو باسشىسى مادينا ابىلقاسىموۆا مالىمدەدى.
مينيستر ەتنيكالىق قازاقتاردى قازاقستانعا كوشىرۋ نەمەسە تاريحي وتانىنا قايتارۋ دەموگرافياعا وڭ اسەر ەتەتىنىن اتاپ ءوتتى.
“شەتەلدە تۇراتىن ەتنيكالىق قازاقتارعا قازاقستانعا قونىس اۋدارۋ ءۇشىن جاعداي جاساۋ ماقساتىندا ازاماتتىق الۋدىڭ جەدەلدەتىلگەن (جەڭىلدەتىلگەن) ءتارتىبىن ەنگىزۋ قاراستىرىلىپ وتىر. سونداي-اق ولارعا قانداي دا بىر رۇقساتسىز جانە ورالمان مارتەبەسىنىڭ بار-جوعىنا قاراماستان جۇمىسقا ورنالاسۋ قۇقىعى ۇسىنىلادى”, —دەدى ابىلقاسىموۆا ەسەپ بەرۋ كەزدەسۋىندە.
سونىمەن قاتار, ونىڭ ايتۋىنشا, ورالماندارعا جاڭا ورتاعا بەيىمدەلۋىنە جاردەمدەسۋ ماقساتىندا ميگرانتتاردى اقپاراتتىق جانە قۇقىقتىق قولداۋ ورتالىقتارى قۇرىلادى. ال ەڭبەك رەسۋرستارى تاپشى وڭىرلەردە ءتىل ۇيرەنۋ كۋرستارى ۇيىمداستىرىلماق.
“جىل سايىن قازاقستانعا ەڭ كەمى 20 مىڭ ورالمان كەلەدى دەپ جوسپارلاپ وتىرمىز”, — دەدى مينيستر.
سونىمەن قاتار, ابىلقاسىموۆا مينيسترلىك ەل ەكونوميكاسىندا سۇرانىسقا يە ءارتۇرلى ءپروفيلدى بىلىكتى ماماندارعا ۇزاق مەرزىمدىك جاعداي جاساۋ نەگىزگى باسىمدىقتاردىڭ ءبىرى ەكەنىن اتاپ ءوتتى.
“قولدانىستاعى كوشى-قون زاڭناماسى ەلىمىزدىڭ ەكونوميكالىق, الەۋمەتتىك, دەموگرافيالىق دامۋىنداعى قاجەتتىلىكتەر مەن جۇمىس بەرۋشىلەردىڭ مۇددەسىنە تولىعىمەن سايكەس كەلمەيدى. زاڭ ا شەتەلدەن ۋاقىتشا جۇمىس كۇشىن تارتۋعا باعىتتالعان جانە وندا ەڭبەك ميگرانتتارى مەن ورالمانداردى ورتاعا بەيىمدەۋ شارالارى كوزدەلمەگەن”, — دەدى ۆەدومستۆو باسشىسى.
كوشى-قون ساياساتىنىڭ تۇجىرىمداماسىن جۇزەگە اسىرۋ بويىنشا ءىس-شارالار جوسپارىنا سايكەس بيىل كوشى-قون پروتسەستەرىنىڭ تيىمدىلىگىن ارتتىرۋ بويىنشا شارالار قابىلدانادى.
“ەكونوميكاعا قاجەتتى شەتەلدىك جۇمىس كۇشىن تارتۋ سالاسىندا مىنالار قاراستىرىلعان: جۇمىس رۇقساتتارىن بەرۋ جۇيەسىن جەتىلدىرۋ; قاجەتتىلىكتى باعالاۋدىڭ ءتيىمدى تەتىكتەرىن قۇرۋ جانە شەتەلدىك جۇمىس كۇشىن تارتۋ تەتىكتەرىن جەتىلدىرۋ; ىسكەرلىك ماقساتتا كەلەتىن, ينۆەستيتسيالىق جانە كاسىپكەرلىك قىزمەتكە قاتىساتىن شەتەلدىك ازاماتتاردىڭ ەل اۋماعىنا كىرۋ ەرەجەلەرىن جەڭىلدەتۋ. بۇل شارالار ەل ەكونوميكاسىن جىل سايىن ەڭ كەمى 40 مىڭ بىلىكتى شەتەلدىك مامانمەن قامتۋعا مۇمكىندىك بەرەدى”, — دەدى ابىلقاسىموۆا.
مينيستر اتالعان شارالار قازىرگى تاڭدا كوشى-قون پروتسەستەرىن رەتتەۋ ماسەلەلەرى بويىنشا زاڭ جوباسىنىڭ تۇجىرىمداماسىندا ەسكەرىلەتىنىن اتاپ ءوتتى.
