ورالمان كۋالىگى

ورالمان كۋالىگىنىڭ ۋاقىتى ءوتىپ كەتسە…

قازاقستان رەسپۋبليكاسىنىڭ زاڭىنا سايكەس ورالمان مارتەبەسى ياعني ورالمان كۋالىگى ءبىر رەت قانا بەرىلەدى. ەگەر كۋالىكتىڭ ۋاقىتى ءوتىپ كەتكەن جاعدايدا التى ايدىڭ ىشىندە تاعى 3 ايعا عانا ۇزارتۋعا بولادى. ال, بۇل مۇمكىندىكتى جىبەرىپ الساڭىز, وندا ءسىزدىڭ ورالمان كۋالىگىڭىز مۇلدەم ۇزارتىلمايدى. ەندى ورالمان كۋالىكتىڭ ۋاقىتى ءوتىپ, ۇزارتۋ مۇمكىندىگى بولماي قالعان قانداستار قايتپەك كەرەك?

ەگەر ورالمان كۋالىگى بولماسا, قر ازاماتتىعىن الۋعا قۇجات تاپسىرا المايدى. مىنە بۇل كوشى-قون زاڭىنىڭ قانداستار اراسىندا قيىندىق تۋىدىرىپ وتىرعان كەدەرگىلەردىڭ ءبىرى. سەبەبى, كەيبىر ورالمان باۋىرلارىمىز ىقتيار حات پەن ورالمان كۋالىككە قۇجاتتى ءبىر مەزگىلدە تاپسىرادى ەكەن. ناتيجەسىندە, ورالمان كۋالىك تەز شىعىپ, ىقتيار حاتى دايىن بولعانشا جىل ءوتىپ كەتكەن جاعدايلار وتە كوپ. سالدارىنان ورالمان كۋالىكتىڭ ۋاقىتى ءوتىپ, قازاقستان رەسپۋبليكاسىنىڭ ازاماتتىعىن الۋعا قۇجات تاپسىرا الماي قينالىپ جاتادى. بۇدان بولەك, قىتايدان كەلگەن قانداستارىمىز قىتايدان قازاقستانعا شىعاردا ۆيزا ۋاقىتىنان تىس, جەرگىلىكتى ۇكىمەتكە «ەكى-ءۇش اي مەرزىمدە قايتىپ كەلەمىز» — دەپ, قولحات جازىپ قالدىرادى ەكەن. ەگەر سول ءۇش اي مەرزىمدە قايتپاعان جاعدايدا سول جاقتا قالعان تۋىستارىن قاماۋعا الادى. وسى كەلىسىم حاتتىڭ كەسىرىنەن قازاقستانعا كەلىپ, ىقتيار حات پەن ورالمان كۋالىككە قۇجات تاپسىرىپ قايتىپ كەتۋگە ءماجبۇر بولاتىندارى قانشاما? الايدا قىتاي ۇكىمەتى قايتىپ بارعان قانداستارىمىزدىڭ قۇجاتتارىن جيناپ الىپ, ەكى-ءۇش جىل قازاقستانعا شىعارمايدى. وسى ارالىقتا الگى قازاق ەلىندە جيناپ كەتكەن قۇجاتتارى دايىن بولىپ قانا قويماي, ۋاقىتى ءوتىپ كەتەتىن كورىنەدى. بۇدان تىس, قانداستاردىڭ وزدەرى دە قۇجات ماسەلەسىنە سالعىرت بولسا كەرەك. وعان كريلليتساعا ساۋاتسىزدىعىن قوسىڭىز. اراداعى دەلدالداردىڭ «قىزمەتى» تاعى بار. ءدال وسىنداي كوپتەگەن كەدەرگىلىكتەر اقىر اياعىندا قۇجاتتارىنىڭ ۋاقىتى ءوتىپ كەتۋگە اكەلىپ تىرەلەدى ەكەن.

ءبىز بۇل ماسەلەنى قانداستارمەن تىكەلەي ارالسۋ, جينالىستار وتكىزۋ بارىسىندا انىقتادىق. ءتىپتى بۇگىنگى تاڭدا «ادىرنا» بىرلەستىگىنىڭ اتىنا كەلىپ تۇسكەن ءوتىنىش حاتتاردا ەسەپ جوق. وعان تۇرتكى بولعان الماتى قالاسى ىشكى ساياسات باسقارماسىنىڭ تىكەلەي قولداۋىمەن قولعا الىنىپ وتىرعان «وتان وتتان دا ىستىق» جوباسى. جوبا باستالعالى بەرى ورالمان كۋالىكتىڭ «جىرىمەن» حات جازىپ, جەدەل جەلىگە قوڭىراۋ شالعاندار قانشاما? ەندىگى ماقسات «وسى ورالمان مارتەبەسى كەرەك پە?» — دەگەن تۇيتكىلدى ساۋالعا جاۋاپ ىزدەۋ. سول ارقىلى ەلىمىز ازاماتتىعىن الا الماي جۇرگەن كوپتەگەن قانداسىمىزدىڭ ماسەلەسىنە جۇرت نازارىن اۋدارتۋ بولماق.

ىلمەكتەر

وسى ايداردا

دوباۆيت كوممەنتاري

Close