Oralman mártebesi azamattyq alýǵa kedergi bolmaýy kerek

Almaty qalasy Ishki saıasat basqarmasynyń qoldaýymen qolǵa alynǵan «Otan ottan da ystyq» jobasy óz nátıjesin berip jatyr. Joba barysynda keıbir qandastarymyz ala almaı júrgen qujattaryn alsa, keıbiri tegin quqyqtyq keńeske júginip, deldalsyz jumys joldaryn túsindi.
Ásirese, Almaty oblysy, Shelek aýylyndaǵy keıbir qandastar úshin tıimsiz qıynshylyqtardy kózben kórip kelgen joba músheleri mán-jaıdy birden joǵaryǵa jazǵan edi. Ondaǵy jemqorlyq faktilerin, qyzmetkerlerdiń dórekiligi, deldaldyq júıeniń qalyptasýy sııaqty bir qatar problemalardy kótergen bolatynbyz. Nátıjesinde, araǵa aı salmaı jatyp oblystyq kóshi-qonnan «Shelek máselesi» boıynsha tekseris júrip jatqanyn habarlady.

Endi mine mınıstrlikten hat kelip jatyr. Demek, bul – úkimettiń, quzyrly organdardyń qandastar máselesine beı-jaı qaramaıtyny. Tek problema joǵary jaqqa júıeli, naqty jetpeıtindigi jáne Elbasynyń qatań tapsyrmasynyń nátıjesi dep bilgen jón. Endigi kezekte «oralman mártebesiniń ýaqytyn uzartý nemese oralman mártebesi azamattyq alýǵa kedergi bolmaýy kerek» — degen usynysymyzdy QR parlamenti qabyl alsa, naǵyz súıinshileıtin kún týar edi. Iaǵnı, biz oralman kýáliginiń ýaqyty ótip ketýine baılanysty elimizdiń túkpir-túkpirinde myńdaǵan qandastyń azamattyqqa zar bolyp júrgeni týraly parlamentke usynys hat joldaǵan bolatynbyz. «Adyrna» birlestiginiń bul usynysyna jaýap áli kelmedi. Biraq qandaıda bir oń ózgeris bola qalyp jatsa, qazirgi oralmandardyń japa-tarmaǵaı QR azamaty bolyp shyǵa kelýine 100 paıyz kepildik bolar edi. Elge kelip sabylyp júrgen myńdaǵan qandastyń jan aıqaıyn QR parlamenti qaraýsyz qaldyrmaıdy degen senim basym. Egerde qandaıda bir jaǵymdy jańalyq bola qalsa, ózderińizden birinshi bolyp súıinshi suraýǵa biz daıynbyz.

Qurmetolla MUHAMETHANULY, «qandastar.kz» úshin