ماڭعىستاۋ تەاترى الماتىدا

ءساۋىردىڭ 27-ءى كۇنى ماڭعىستاۋ وبلىستىق نۇرمۇحان ءجانتورين اتىنداعى مۋزىكالىق دراما تەاترى الماتىداعى گاسترولدىك ساپارىن باستادى. ساپاردىڭ شىمىلدىعى اتاقتى گرۋزين جازۋشىسى اۆكسەنتي تساگارەليدىڭ «حانۋما» پەساسىمەن اشتى. پوپ-ارت جانرىنداعى كومەديالىق سپەكتاكل شەتەل ساحنالارىندا كەڭ تانىمال. ەڭ العاش رەت 1972 جىلى رەسەيدىڭ ۇلكەن تەاترىندا قويىلعان. مۋزىكالىق ديناميكامەن ورىلگەن قويىلىم, بۇل رەتتە دە الماتى جۇرتشىلىعىن كۇلكىگە قارىق قىلدى. 

ءتيفليستىڭ اۋقاتتى كوپەسى اقسۇيەكتەرمەن قۇدالاسۋدى ارماندايدى. بار ويى – سول ارقىلى مارتەبەسىن اسىرۋ. ماقساتىنا جەتۋ ءۇشىن ورىمدەي قىزىن كارى كنيازگە كۇيەۋگە بەرمەك. كنيازدىڭ كەدەيلەنىپ قالعانى دا كەدەرگى ەمەس, ونىڭ اتاق-ابىرويىنىڭ بيىكتىگى, دارەجەسى ماڭىزدى بولدى. ال كوپەستىڭ 18 جاسار قىزى سونا بولسا كنيازدىڭ جاس ءارى ونەرلى باۋىرىنا عاشىق. وقيعا كارى كنيازدى ۇيلەندىرۋگە جانىن سالىپ, باس قۇدالىققا تالاسقان جەڭگەتايلار كاباتو مەن حانۋمانىڭ اراسىنداعى تارتىسپەن ءوربيدى. كاباتو جەڭگەتاي كنياز بەن جاس سۇلۋ سونانى قوسپاق. ال حانۋما تاپقان قالىڭدىقتىڭ جاسى قىرىققا تاياعانىمەن مال-مۇلكى مول. كەيىپكەرلەر اراسىنداعى قىم-قيعاش قاتىناستار گرۋزيننىڭ اۋەزدى ءان-بيلەرىمەن ءوربىپ, وقيعا شيراتىلا تۇسەدى. سوڭىندا اركىم وزىنە تيەسىلىنى الادى. قويىلىمنىڭ رەجيسسەرى – گۇلسينا مەرعاليەۆا.



سونداي-اق, تەاترى ۇجىمى الماتى كورەرمەندەرىنە الداعى كۇندەر «اتىڭ ءوشسىن…», «ءاليحاننىڭ اماناتى», «گاملەت» جانە «شىڭىراۋ» قاتارلى قويىلىمداردى ۇسىنباق.



قۇرمەتوللا مۇحامەتحان ۇلى