ەلىمىزدە اتا-انالاردىڭ تولقۇجاتىنا بالالارىنىڭ فوتوسۋرەتتەرى جاپسىرىلمايتىن بولادى

قازىرگى ۋاقىتتا ءىىم 16 جاسقا دەيىنگى بالالاردىڭ اتا-انالارىمەن بىرگە شەتەلگە شىعۋ كەزىندە فوتوسۋرەتتەرىن ولاردىڭ تولقۇجاتتارىنا جاپسىرۋ تالابىن الىپ تاستاۋ بويىنشا ەلىمىزدىڭ زاڭنامالارىنا تۇزەتۋلەر ەنگىزۋدە.

قازاقستان رەسپۋبليكاسى ءىىم ءباسپاسوز قىزمەتىنىڭ مالىمەتىنشە, قازاقستاندا بيومەتريالىق تولقۇجاتتاردى بەرۋ (ەلەكتروندى چيپپەن) 2009 جىلدان باستالدى.

انا-انالاردىڭ تولقۇجاتىنا بالالارى تۋرالى قولمەن ەنگىزىلگەن جازبادا بيومەتريالىق مالىمەتتەر بولمايدى, سول سەبەپتەن شەكارادان ءوتۋ كەزىندە پروبلەمالار تۋىنداپ, كەي جاعدايدا ازاماتتار كەرى قايتارىلىپ جاتادى.

الەم بويىنشا قۇجاتتىق-ۆيزالىق باقىلاۋدان وتكىزۋ, جەكە باستى انىقتاۋ شارالارى جەتىلدىرىلۋدە جانە بيومەتريالىق مالىمەتتەرى بار قۇجاتتار (تسيفرلى فوتوسۋرەتتەر, ساۋساق تاڭبالارى, كوزدىڭ شاتىرشا قابىعىنىڭ كەسكىنى جانە ت.ب.) ەنگىزىلۋدە.

قازاقستاندىقتار كوپ باراتىن ەلدەردە (اقش, ۇلىبريتانيا, ءباا, يتاليا, يسپانيا, فرانتسيا, چەحيا, سلوۆەنيا, حورۆاتيا, گرەتسيا, ۆەنگريا, پولشا, گەرمانيا, شۆەيتساريا, شۆەتسيا, قىتاي, وڭتۇستىك كورەيا جانە باسقالارى) سول مەملەكەتكە اتا-انالارىمەن كەلگەن بالالاردىڭ تولقۇجاتى بولۋى مىندەتتى. ال اتا-انانىڭ تولقۇجاتىنا بالالاردىڭ فوتوسۋرەتتەرىن جاپسىرۋ قۇجات رەتىندە مويىندالمايدى.

اتا-انالاردىڭ تولقۇجاتىنا فوتوسۋرەتتەردى جاپسىرۋدان باس تارتۋ ءبىرىنشى كەزەكتە شەت ەلدە قيىن جاعدايدا تاپ بولۋى مۇمكىن بالالاردى قورعاۋعا جانە ولاردى شەتەلگە زاڭسىز تاسىمالداۋ تاۋەكەلدەرىنە بايلانىستى بولىپ وتىر.

بالالارعا تولقۇجات تەك شەتەلگە شىققاندا عانا قاجەت, رەسپۋبليكا اۋماعىندا ونىڭ جەكە باسى تۋى تۋرالى كۋالىكپەن, ۇلكەن ازاماتتار جەكە كۋالىگىمەن راستالادى.

قازىر جازعى دەمالىس جاقىنداپ كەلەدى. وسىعان بايلانىستى ءىىم شەتەلگە بارۋدى جوسپارلاعان اتا-انالارعا باسقا مەملەكەتتىڭ شەكاراسىنان ەركىن ءوتۋ ءۇشىن وزدەرىمەن باراتىن بالالاردىڭ تولقۇجاتتارىن كۇنى بۇرىن راسىمدەۋگە كەڭەس بەرەدى.

دەرەك كوزى: http://stan.kz/elimizde-ata-analardin-tolkyzhatina-balalarinin-fotosuretteri-zhapsirilmaytin-boladi-315854/