«Adam tanymastaı ózgergen»: Áskerge ketkenine bir aı tolmaǵan sarbaz psıhıkalyq naýqastar aýrýhanasyna tústi

Foto: Sputnik.kz
Almaty oblysy Talǵar qalasynyń 2007 jylǵy týmasy Armanjan Aryqbaı áskerge barǵan kúni esinen tanyp qulap qalǵan. Balamdy kúshpen alyp ketti degen anasy bir aptada balanyń aýrýhanadan bir-aq shyqqanyn aıtady. Oqıǵa qalaı bolǵanyn Sputnik Qazaqstan tilshisi anyqtady.

Armanjannyń anasy Farıda Qajymuratovanyń aıtýynsha, balasyn saýda úıiniń aldynan áskerge kúshtep alyp ketken. Qonaevtaǵy áskerı komıssarıatta bolyp, eki kúnnen soń jas sarbaz Tarazdaǵy áskerı bólimge attanady. Poıyzdan túsip, sapqa turǵan boıda Armanjan esinen tanyp qulaǵan.

«Tarazdaǵy 5513 áskerı bólimi bir aptadan soń balamdy Almatyǵa qaıta qaıtardy. Ulttyq ulannyń áskerı bólimine ákelip, balam tekserýden ótti. Sol kezde kezdestim. Balamnyń aıtýynsha, Qonaevtaǵy áskerı komıssarıatta ony Álisher esimdi áskerı urǵan. Sol kúni Armanjan sııaqty taǵy bir jigitti sol komıssarıatqa kúshtep alyp kelipti. Jańaǵy Álisher «mynany kóndirip qoıyńdar, áıtpese bárińdi uramyn» degen. Biraq jańaǵy kúshpen kelgen bala kónbegen. Sodan Álisher kelip bárin bastan urǵan. Armanjan sol jerde qulap qalǵan», — deıdi Farıda Qajymuratova.

«Kózi dir-dir etip, jas aǵa beredi. «Balam, bir jeriń aýyryp tur ma, nege jylap tursyń» dep surap em, «aýyrmaıdy, qorqam, qorqam» dep aıta berdi. Júıke júıesine ońbaı soqqy tıgen. Armanjan ashyq jarqyn, aqkóńil bala. Qazir múldem adam tanymastaı ózgergen. Aıaq-qoly dir-dir etedi. Áskerı kıimdegi adamdy kórse buqpantaılap, basyn kótermeıdi. Balam 180 gradýsqa ózgerip ketken», — deıdi anasy.

Almatydaǵy Ulttyq ulanda sarbazdy teksergen dárigerler Farıdaǵa qorqatyn qaýip joq degen.

«Balanyń basynda isik bar dep maǵan jaýap jiberdi. 3 shildede balamdy kóreıin dep Almatydaǵy lazaretke baryp em, bala tekserilý úshin basqa jaqqa ketti dedi. Men úsh saǵat sonda kútip, dárigerden surap em, «sizdiń balańyzdy psıh-dıspanserge jatqyzyp keldim» deıdi. Sonda meniń eshbir ruqsatymsyz júıke-júıesi aýyratyndardyń aýrýhanasyna nege jatqyzǵan? Nege maǵan bir aýyz aıtyp eskertpedi? Balam tiri me, óli me ózi, áli bilmeımin», — deıdi anasy.

Farıda balasyn izdep aýrýhanaǵa barǵan. Alaıda esiginen kire almaǵan. Jumys ýaqyty aıaqtalyp, aýrýhana basshylyǵymen tildesýge múmkindik bolmaǵan.

Farıda Qajymuratova II toptaǵy múgedek, kózi nashar kóredi. Balamdy izdep, qarys-qadam júrýdiń ózi muń bolyp otyr, deıdi ana.

Ulttyq ulan sarbazdy qurysý ustamasy qysyp, ol dereý medıınalyq mekemege jetkizilgen.

«5513 áskerı bóliminiń oqý pýnktinde merzimdi áskerı qyzmetin ótkerip júrgen áskerı qyzmetshi 17 maýsym kúni qurysý ustamasy qysyp, dereý medıınalyq mekemege jetkizildi. О́ziniń aıtýynsha, áskerge shaqyrylǵanǵa deıin ol basynan jaraqat alǵan, sodan keıin osyndaı jaǵdaılar anda-sanda baıqalyp otyrǵan», — deıdi Ulttyq ulannyń «Ońtústik» óńirlik qolbasshylyǵyndaǵylar.

Ulttyq ulannyń málimetinshe, qazirgi ýaqytta ol Almaty qalasyndaǵy Respýblıkalyq psıhıkalyq densaýlyq ortalyǵynda tekserýden ótip jatyr.

«Jaǵdaıy qanaǵattanarlyq, tereńdetilgen medıınalyq tekserý júrgizilip, qajetti medıınalyq kómek kórsetilip jatyr», — dedi Ulttyq ulandaǵylar.

Armanjannyń otbasynda úsh bala bar, eki ul, bir qyz. Buǵan deıin esh jerde tóbelesip, basynan soqqy almaǵan balasynyń bolashaǵyna anasy alańdap otyr.