Қазақстандағы алғашқы атом электр станциясын салу жобасы нақты іске асыру кезеңіне өтті, деп хабарлайды qandastar.kz порталы.
Владивостокта өтіп жатқан XI Шығыс экономикалық форумы аясында АЭС-ті жобалау, жабдықтау және салу жөніндегі келісімшартқа қол қойылды.
Құжатқа «Қазақстан атом электр станциялары» ЖШС мен «Росатомның» еншілес кәсіпорны «Атомстройэкспорт» АҚ қол қойды.
Келісімге қол қою рәсіміне Қазақстанның Атом энергиясы агенттігінің төрағасы Алмасадам Сәтқалиев пен «Росатом» бас директоры Алексей Лихачёв қатысты.
Бұл құжат Қазақстандағы алғашқы АЭС жобасының жаңа практикалық кезеңге өткенін білдіреді. Енді тараптар 2026 жылғы 28 мамырдағы үкіметаралық келісімге сәйкес қажетті рәсімдерді, соның ішінде Қазақстан үкіметімен келісу жұмыстарын жүргізеді.
АЭС салу елдің өсіп келе жатқан электр энергиясына сұранысын қамтамасыз етуге бағытталған. Мамандардың айтуынша, экономика, өнеркәсіп, инфрақұрылым, цифрландыру және жасанды интеллект дамыған сайын тұрақты энергияға қажеттілік те арта түседі.
Жоба тек энергетика саласына ғана емес, отандық өнеркәсіпке де әсер етпек. АЭС құрылысына қазақстандық кәсіпорындар, мамандар, тауарлар мен қызмет көрсетушілерді барынша тарту көзделген.
Сонымен қатар жоба жаңа өндірістердің пайда болуына, заманауи технологиялардың енгізілуіне және атом энергетикасы бойынша білікті мамандар даярлауға мүмкіндік береді.
Осылайша, Қазақстанның алғашқы АЭС жобасы елдің энергетикалық қауіпсіздігін күшейтіп қана қоймай, атом өнеркәсібінің жаңа бағыттарын қалыптастыруға негіз болмақ.
