«ايەلدىڭ ەركىندىگىن شەكتەۋ بۇل»: بايان الاگوزوۆا رۇستەم جۇگىنىسوۆكە تەكسەرىس جۇرگىزۋدى تالاپ ەتتى

پروديۋسەر بايان الاگوزوۆا ءانشى رۇستەم جۇگىنىسوۆتىڭ «مەشىتكە ايەلدەر كۇيەۋىمەن نەمەسە باۋىرلارىمەن بارۋى كەرەك» دەگەن پىكىرى ءۇشىن تەكسەرىس جۇرگىزۋدى تالاپ ەتتى, دەپ حابارلايدى qandastar.kz

بۇل تۋرالى ول Instagram پاراقشاسىنداعى stories-تە جاريالادى.

«نيكياح دەپ قىزدان ءبىر رەتتىك جىنىستىق قاتىناس سۇراپ تۇر. ەڭ سوراقىسى – ءانشى رۇستەم جۇگىنىسوۆ قىزدارعا كۇيەۋسىز نەمەسە باۋىرلارىمەن بىرگە بارماي, جالعىز جۇرمەڭدەر دەپ كەڭەس بەرىپ وتىر. مەن ۋاكىلەتتى ورگانداردان ونىڭ ارەكەتىنە قاتىستى كەم دەگەندە تۇسىندىرمە جۇمىستارىن جۇرگىزۋدى سۇرايمىن. ويتكەنى بۇل – ايەلدەردىڭ قۇقىقتارى مەن ەركىندىكتەرىن قوعامدىق كەڭىستىكتە تىكەلەي شەكتەۋ. ءبىز شاريعات جولىنداعى ەمەس, تاۋەلسىز مەملەكەتتە ءومىر سۇرەمىز. قىز بولسىن, ايەل بولسىن ءوزى كەز-كەلگەن جەرگە بارۋعا, جۇرۋگە قۇقىلى. ايتقان سوزىڭىزگە جاۋاپ بەرەسىز بە? ادامداردى ولاي اداستىرماڭىز. سىزگە ۇناماسا, اۋعانستان, يران, اراب ەلدەرىنە كوشىپ كەتىڭىز», – دەدى پروديۋسەر.

ايتا كەتەيىك, بۇعان دەيىن اقتوبەدەگى «نۇر عاسىر» مەشىتىندە ورامال تاققان جاس قىزعا بەلگىسىز ەر ادام ينتيمدىك ۇسىنىس جاساپ, «ءبىر رەتتىك نەكە» جاسايىق دەپ تيىسكەن بولاتىن. بۇل وقيعا قوعامدا ۇلكەن رەزونانس تۋدىرىپ, قىزۋ تالقىعا ءتۇستى. وسى جاعدايعا بايلانىستى ءانشى رۇستەم جۇگىنىسوۆ: «ەگەر مەشىتتە سولاي جۇرسەڭىزدەر, ەر ادامدار ءتۇرلى ويعا كەتۋى مۇمكىن. سوندىقتان اباي بولىڭىزدار. نامازدى كەشكە ۇيدە وقىعان دۇرىس», – دەپ پىكىر بىلدىرگەن.