«Áıeliń – jezókshe, balań jetim qalady»: kúdikti Jıembaı ózin Rýslan Berdenov eki apta qorlaǵanyn aıtty

Foto: contur.kz

Shymkent qalalyq sotynda qala ákiminiń orynbasary Rýslan Berdenovti jaralaǵan kúdikti Ernar Jıembaıdan jaýap alý jalǵasyp jatyr, dep habarlaıdy qandastar.kz Kursiv.media-ǵa silteme jasap.

Buǵan deıin Jıembaı Rýslan Berdenovpen bolǵan alǵashqy kezdesýi qalaı bastalǵanyn aıtqan edi. Jıembaıdyń pikirinshe, osy birinshi kezdesýinshe Berdenov onyń ár sózine shúılikken. Ar-namysyna tıetin sózder aıtqan.

«Seniń túriń qandaı qandaı ózi? Shashtaryń túsip qalǵan. Qaıdan kelgensiń óziń» dedi. Kóńilime tıip ketti. Biraq ol kisige artyq sóz aıtpadym. «Jumysta osylaı kıinesińder me sender» dedi. Jaǵdaıdy túsindireıin dep edim, ýyn shashyp jiberedi. Qabyldamaı jatty. Men sóıleımin, ol jerge kirgizedi. Jumysymdy kórseteıin desem, «sen ózi qandaı adamsyń» dep, balaǵattady. Kabınetinen shyǵyp kettim», – dedi ol.

Jıembaıdyń aldynan kómekshisi shyǵyp qalǵan. Oǵan bar jaıdy aıtqanda kúte turýyn suraǵan. Kómekshisi qaıta kirýin suraǵan. «Turǵyn úı Shymkent» jaýapkershiligi shekteýli seriktestiginiń 2024 jylǵy bıýdjeti týraly jumysyn aıta bastaǵanda sózin qaıta toqtatqan.

«Sen mylqaýsyń ba, otyrshy» dedi. «Ne úshin ar-namysyma tıetin sózderdi aıtyp otyrsyz, jekeme ótpeseńizshi» dedim. «Aryz jaza salshy» dedi. «Ketem» dedim. Balaǵattady. «Shyq ta ketshi» dedi. Kettim. Men ne istep qoıdym? Keshke qalalyq qurylys basqarmasynan habarlasyp, Berdenov seni «sottatamyn» dep jatyr dep sálemdemesin aıtty», – dedi sottalýshy.

Jıembaı Berdenovtiń bul sálemdemesin birneshe adamnan aıtqyzǵan. Sodan keıin Jıembaı Berdenovpen ashyq sóılesý amalyn izdegen. 5 adamǵa «esigimdi attap baspasyn, men ony sottatamyn, oda múmkindik joq. Minez kórsetti» degen. Araǵa taǵy 5 adamdy salyp, Berdenovpen qaıta kezdesýge kelisken.

«Bir nárse istep qoısam túsinemin. Jáıdan jáı taǵdyrymdy syndyryp jibereıin dep jatyr. Aradan eki apta ótti. Osy ýaqyt ishinde kúızeliske tústim, stress aldym. Kabınetine keldim. Berdenov «sen kirshi» dedi. Eń qatty ashýlanǵanym sol jer boldy. «Sen aryz jazbaımyn dep jatyr ekensiń ǵoı. Ernar seni qamatamyn. Áıeliń ádemi eken. Qamalasyń áıeliń jezókshe bolady, balań jetim qalady. Saǵan sol kerek pe?» dedi. Úndemedim, biraq ashýlandym. Balaǵattady. «Kim ne aıtqanyn bilmeımin. Sizdi qurmetteımin. Meni qamatamyn degenińizdi túsinbedim. Ne úshin maǵan tis qaırap tursyz? Ne istedim sizge? Áıelime laık basqanyńyzdy kórip, qyzǵanysh sezimderimdi aıtyp jatqan joqpyn» desem, «sen áıelińdi maǵan jabystyrma. Qatynyńa ıe bol. О́zińe senimsiz erkeksiń ǵoı» dep meniń aıtqanymby basqa jaqqa buryp ketti», – dedi Jıembaı sotta.

Jıembaı men Berdenovtiń sózi bul kezdesýde de jaraspaǵan. Jıembaı ákesiniń onkologııamen aýyratynyn, ápkesi 4 balasymen ajyrasyp kelgenin, tuńǵysh balasy erekshe bala ekenin jetkizgen. Namysyna tımeýdi suraǵan.

«1 aıda aryzyńdy jaz. Áıelińe q..- ǵyń turmaıdy» degende uryp jibergim keldi. О́zimdi jerden tómen sezindim. «Shekten shyǵyp kettińiz» dedim de shyǵyp kettim. О́lgim kelip ketti. Namystan ólip kettim. О́z-ózimdi qoıarǵa jer tappaı kettim. Arada ýaqyt ótti. 20 sáýir kúni keshke áıelimmen urys bastaldy. Tańerteń bala-shaǵany balabaqshaǵa alyp baryp, jumysqa baratyn boldym. Urys jalǵasty. Basymdy ketirgen áıelimniń «Men kúıeýimniń belsendi, bulshyq etti, keleshegi bar bolǵanyn qalaımyn» degini. Bul erkek retinde namysyma tıip ketti. «Kimdi mysalǵa keltirip tursyń?» dedim. «Rýslan Berdenov» dedi», – dedi sottalýshy.

Bul oqıǵadan soń sol kúni Jıembaı áıelimen ajyrasýǵa sotqa aryz túsirgen. Buǵan áıeli qarsy bolmaǵan. Búgingi sot otyrysyna jábirlenýshi Berdenov densaýlyǵyna baılanysty kelmedi. О́tken joly aldyn ala tyńdaý kezinde sýdıa Abınur Qarabaev Berdenovtiń sotqa kelip qatysýyn mindettegen edi.

Aıta keteıik Ernar Jıembaıdyń isi sotqa Qylmystyq kodekstiń «Adam óltirý» (99-baptyń 1-bóligi) baby jáne «Qylmysqa daıyndalý jáne qylmysqa oqtalý» babymen (24-baptyń 3-bóligi) túsken.