Ақтөбеде зейнеткер мен оның 15 жастағы немересі қайтыс болған оқиға бойынша тергеу амалдары басталды. Ал марқұм жасөспірімнің жергілікті футбол клубының капитаны болғаны белгілі болды, деп хабарлады qandastar.kz.
Қайғылы жағдай жеке тұрғын үйде тіркелген. Тергеушілердің нұсқасы бойынша, тұрғындар көмірқышқыл газынан уланған. Қазір мамандар үйдегі жылыту және газ жүйелеріне сараптама жүргізіп жатыр.
Полиция департаментінің өкілі Нариман Мұхтаровтың айтуынша, үш адамның өліміне қатысты сотқа дейінгі тергеу басталған.
«Газ жабдықтарының жағдайы тексеріліп, уланудың нақты себебі анықталып жатыр», – деді ол.
Марқұм болған 15 жастағы Арон Мұса – алты баланың үлкені. Ол атасы қайтыс болғаннан кейін әжесіне көмектесу үшін сол үйге көшіп барған.
“Ақтөбе” футбол клубының басшылығы Аронды ерекше дарынды әрі жауапкершілігі жоғары ойыншы болғанын айтады.
«Ол жасөспірімдер командасының капитаны еді. Қазақстан құрамасына үміткерлер тізіміне енгізілген. Болашағынан зор үміт күттірген ойыншы болатын», – дейді клуб төрағасы Санат Шалекенов.
Оқиғадан кейін облыс әкімі аймақтағы тұрғын үйлердің жылыту жүйелерін толық тексеруді тапсырды. Алдын ала болжам бойынша, газ қондырғысының ақауы немесе оны дұрыс пайдаланбау адам өліміне себеп болуы мүмкін.
Қаза тапқан отбасының жақындарына жергілікті билік тарапынан материалдық және психологиялық көмек көрсетілетіні хабарланды. Сонымен бірге “Ақтөбе” клубы жас футболшының отбасына қолдау ретінде қаражат жинауды бастап кетті.
Арон соңғы ойынын бар-жоғы екі апта бұрын өткізген. Команда мүшелері оны спортқа адал, еңбекқор әрі жанкүйерлер сүйіктісі болғанын айтады.