Ақтөбе қаласының Алматы ауданында жеке тұрғын үйлердің бірінен әйел адам мен үш кәмелетке толмаған баланың мүрделері табылды, деп хабарлайды qandastar.kz порталы.
Алдын ала мәліметтерге сәйкес, олар газ жабдықтарын дұрыс пайдаланбау салдарынан табиғи газдан уланып қалған.
Оқиғаның нақты себептері мен мән-жайлары анықталуда.
Ақтөбе облысының әкімі тапсырмасымен жағдайды жан-жақты зерделеу үшін арнайы комиссия құрылды.
Комиссияны Ақтөбе қаласының әкімі Азамат Бекет басқарады.
Комиссия уәкілетті органдармен өзара іс-қимыл жасай отырып, тексеру жүргізіп, тергеу қорытындысы бойынша тиісті шаралар қабылдайды.
Қазіргі уақытта құзырлы органдар тарапынан тергеу амалдары басталды.
Ақтөбе облысының әкімдігі марқұмдардың туған-туыстары мен жақындарына қайғыра көңіл айтады.
Жергілікті атқарушы органдар тарапынан жерлеу рәсімін ұйымдастыруға көмек көрсетіліп, сондай-ақ қажетті материалдық және әлеуметтік қолдау көрсетілетін болады.
