Jańalyqtar
Aqtóbelik depýtattyń týystaryna tender alýǵa kómektesetinin ashyq moıyndaǵan vıdeosy tarady
Foto: Instagram.com (@farzaliyev.vidadi)
Aqtóbe máslıhatynyń depýtaty Vıdadı Farzalıevtiń sózi qoǵamda rezonans týdyrdy. «Baıtaq» partııasynyń ókilimen áńgime barysynda ol týystaryna memlekettik tenderlerdi jeńip alýǵa kómektesetinin ashyq moıyndaǵan, dep jazly qandastar.kz
Degenmen atyshýly málimdemeden keıin de depýtatqa qatysty eshqandaı shara qoldanylmady. Bul týraly Stan.kz aqparat agenttigi habarlaıdy.
Alaıda 11 tamyzda qalalyq máslıhattyń Depýtattyq etıka jónindegi komıssııasy isti jaýyp, eshqandaı tártiptik shara qoldanbaý týraly sheshim qabyldady.
AMANAT partııasynyń oblystyq fılıalynyń baspasóz qyzmeti jaǵdaıǵa asyǵys baǵa bermeýge shaqyryp, tek quzyrly organdar ǵana resmı qorytyndy shyǵara alatynyn málimdedi.
«Eger depýtattyń qyzmettik ókilettigin asyra paıdalanǵany dáleldense, Vıdadı Farzalıevti partııalyq jaýapkershilikke tartý máselesi qaralady. Jalpy, AMANAT partııa Jarǵysy men músheleriniń minez-qulyq erejeleriniń saqtalýyn qatań qadaǵalaıdy», — delingen partııa habarlamasynda.
Degenmen, jeli qoldanýshylary depýtattyń ózi jemqorlyq shemalaryn moıyndap otyrsa da, jergilikti quqyq qorǵaý organdary únsiz qalyp otyrǵanyna ashýly.
“Depýtatty mandatynan aıyryp, týystarynan tenderdi tartyp alý kerek”, “Mine, depýtattardyń bári osylaı aqsha tabady: óz fırmalaryn ár jerge «tyǵyp», tenderdi alady”, “netken bassyzdyq”, “bul jaǵdaıǵa kóz jumýǵa bolmaıdy”, – dep jazdy olar.
