Қазақстанның ерлер арасындағы жекелей сында бірінші ракеткасы Александр Бублик Australian Open–2026 турниріндегі екінші жеңісіне қол жеткізді, деп жазады qandastar.kz.
Әлемдік рейтингте 10-орында тұрған қазақстандық теннисшінің екінші айналымдағы қарсыласы Венгрия өкілі Мартон Фучович болды. Қазіргі таңда ол ATP рейтингінде 54-орында тұр.
Кездесу үш сетке созылып, Бубликтің пайдасына 7:5, 6:4, 7:5 есебімен аяқталды. Матч 2 сағат 13 минутқа жалғасты.
Ойын барысында Александр Бублик 12 эйс жасап, төрт рет қос қате жіберді. Сондай-ақ ол 13 брейк-пойнттың бесеуін сәтті жүзеге асырды.
Осылайша, қазақстандық теннисші Australian Open турнирінің үшінші айналымына алғаш рет жолдама алды. Бұл – Бубликтің осы «Үлкен дулыға» жарысындағы ең үздік нәтижесі.
Келесі кезеңде Александр Бублик әлемдік рейтингте 62-орында тұрған аргентиналық Томас Мартин Этчеверримен кездеседі.
