Aleksandr Mostovoı Cherchesovtyń Reseıge oralatynyn aıtty

Foto: sports.ru

Reseı quramasynyń burynǵy fýtbolshysy Aleksandr Mostovoı Qazaqstan quramasynyń bas bapkeri Stanıslav Cherchesovtyń jumysyna qatysty pikir bildirdi, dep jazdy qandastar.kz

«RB Sport» basylymyna bergen suhbatynda ol Cherchesovty jaqynda qyzmetinen bosatyp, Reseıge oralady dep boljady.

«Gvardıola da, Cherchesov sııaqty, Qazaqstan quramasymen jeńiske jete almas edi. Stanıslav qaıda bara jatqanyn jáne nátıje qandaı bolatynyn bildi. Qazaqtar maǵan renjimesin, biraq olar eshqashan eshteńe jeńgen emes jáne jeńbeıdi de. Árıne, eger jańa Messıleri paıda bolmasa», – dedi Mostovoı.

Onyń aıtýynsha, Qazaqstan quramasy burynǵy bapker Magomed Adıevtyń kezinde jaqsyraq oınaǵan.

«Qazir tipti gol da sala almaı júr… Sirá, Stanıslav qyzmetinen bosatylyp, Reseıge oralady», – dep qosty Mostovoı.

Eske salaıyq, Stanıslav Cherchesov 2023 jyly Qazaqstan quramasynyń bas bapkeri qyzmetine kirisken. Alaıda onyń jetekshiligimen komandanyń nátıjeleri synǵa ushyraýda.