Әлемдік бокс саласында жаңа дәуір басталды. Халықаралық World Boxing ұйымы Геннадий Головкиннің жаңа президент болатынын ресми түрде жариялады, деп жазады qandastar.kz
Қазақстандық боксшы XXI ғасырдың ең үздік орта салмақтағы боксшылары қатарында ұзақ уақыттан бері аталып жүрген, тәуелсіз комиссияның тексеруінен өткен жалғыз кандидат болды.
Бұл сайлау рәсімінің жеңілдетілген форматта өтетінін білдіреді: Жарғыға сәйкес, бір кандидат болған жағдайда конгрестің оны аккламация арқылы бірауыздан бекітуге құқығы бар. Енді 2025 жылғы 23 қарашада Римде Геннадий Головкин ресми түрде қызметке тағайындалып, ұйымның қазіргі басшысы Борис ван дер Ворсттен өкілеттілікті қабылдайды.
Бұған дейін Геннадий Головкин сайлауда жеңіске жеткен жағдайда ресми түрде спорттық мансабын аяқтайтынын айтқан. Қазақстандық аңыздың соңғы кездесуі 2022 жылы өтті – Сауль «Канело» Альвареспен үшінші жекпе-жек нәтижесінде GGG ұпай бойынша жеңілді.
