Almaty oblysynda bir aýyldyń balalary dúkende oqýǵa májbúr

Foto: istockphoto

Almaty oblysy Nura aýylynda balalar dúkende oqýǵa májbúr. Aýyldaǵy jalǵyz mektep qaıta jóndeý júrgizý úshin jabylǵan. Jergilikti turǵyndar bastapqyda mektepti jazǵy kanıkýl kezinde jóndeý josparlanǵanyn, alaıdy odan beri 2 jyl ótkenin aıtyp, renishin jetkizdi, dep habarlaıdy  qandastar.kz  KTK telearnasyna silteme jasap.

Ata-analardyń sózinshe, osy eki jylda oqýshylar ákimdiktiń, Mádenıet úıinde, tipti jergilikti dúken ǵımaratynda sabaq oqyǵan. Mundaı jaǵdaıda balalar qandaı bilim alady, deıdi alańdaǵan ata-analar.

«Bizdiń mektepti jóndeý jumystaryn jasaý úshin japqan. Jumystar toqtap tur. Qurylysshylar múldem joq. Úsh jyl boldy ýádemen ómir súrip kelemiz. Taǵy da basqa jerge jibere me dep qorqamyz. Bizdiń balalar tıisti túrde bilim alyp jatqan joq», — deıdi ata-analardyń biri Araı Muratova.

Mektep 2023 jyldyń mamyr aıynda, oqý jyly aıaqtalmaı jatyp jabylǵan edi. Eki jyl ótti, biraq ózgergen eshteńe joq. Sol kezde ata-analarǵa úsh aıda jóndeý jumystaryn aıaqtap úlgerý kerek dep túsindirgen edi.

«Byltyr dúken ishinen ǵımarat bóldi. Onyń qojaıynyna raqmet. Al bıyl qaıda oqıtynymyzdy bilmeımiz. Bizdiń mektepten basqa jerge aýystyrǵanyn qalamaımyz. Mektebimizdi aıaqtap, osynda balalar durys bilim alǵanyn qalaımyz», — deıdi taǵy bir ata-ana Anargýl Aıtrahımova.

Eń qıyny, ustazdar úzilis kezinde bir ǵımarat pen ekinshi ǵımaratqa baryp úlgerýi kerek. Al sabaqtardy 30 mınýtqa deıin qysqartqan.

Turkistan.kz habarlaǵandaı,  merdiger bolsa, kompanııa qıyn jaǵdaıda otyrǵanyn aıtyp, aqtalyp álek bolǵan. Bilim basqarmasy jaǵdaı baqylaýda ekenine sendirdi.

«Bastapqyda nysandy jyl sońyna deıin aıaqtaýǵa bolatyn edi. Biraq merdigerler oqý qorpýsyn 1 qyrkúıekke deıin aıaqtaý týraly mindettemeni óz moınyna aldy. Túzetýden keıin smeta quny 414 mıllıon teńgeden 623 mıllıon teńgege deıin ósti. Aqsha bar. Qarjylandyrýǵa qatysty másele joq. Jumys sapaly jasalyp, bizge ýaqytyly formalardy berse, aqshany is júzinde tamyz aıynda aýdaramyz», — dep pikir bildirdi Talǵar aýdany bilim basqarmasynyń memlekettik satypalýlar jónindegi býhgalteri Maıra Bosqymbaeva.

Al ata-analar bolsa, 1 qyrkúıekte balalar taǵy da dúkende oqýǵa májbúr bola ma dep qorqyp otyr.

Tolyq nusqasyna gıpersilteme berýdi umytpańyz: https://turkystan.kz/article/264513-almaty-oblysynda-bir-auyldyn-balalary-dukende-oquga-mazbur