Almatyda 25 kún buryn joǵalǵan jasóspirim alaıaqtyqqa qatysy bar degen kúdikke ilingen

Foto: feısbýk

Almatyda 28 shildede joǵalyp ketken 16 jastaǵy Aıdos Ákimbaev tabyldy. Jasóspirimdi izdeý jumystary 25 kúnge sozylyp, ol aman-esen úıine oralǵan, dep jazdy qandastar.kz

Bul týraly Stan.kz aqparat agenttigi habarlaıdy.

Aıdos 28 shilde kúni tańerteń Mamyr-3 shaǵynaýdanyndaǵy úıinen qoqys tógý úshin shyǵyp, iz-tússiz joǵalyp ketken. Beınebaqylaý kameralary ony saǵat 10:53 shamasynda úılerdiń biriniń janynda túsirip alǵan. Alaıda qoqys konteınerlerine baǵyttalǵan kameralar isten shyqqan, sol sebepti balanyń ketken izi tabylmaǵan.

Oqıǵaǵa baılanysty polıııa qylmystyq is qozǵap, izdeý sharalaryna týystary men eriktiler qosylǵan. Aıdostyń anasy áleýmettik jeliler arqyly jurttan kómek surap, ulynyń fotosýretterin taratýmen bolǵan. Osylaısha bala 22 tamyzda tabylǵan.

Atalǵan jaǵdaıǵa qatysty Stan.kz tilshisi Almaty qalalyq polıııa departamentinen mán-jaıdy surap bildi.

Polıııa málimetinshe, anasy iz-tússiz joǵalyp ketti degen balanyń alaıaqtyq áreketke qatysy bar bolyp shyqty.

«Tamyz aıynyń basynda áıel polıııaǵa habar-osharsyz ketkeni týraly aryz bergen. Tekserý barysynda joǵalyp ketken azamattyń asa iri kólemdegi alaıaqtyq deregi boıynsha tirkelgen qylmystyq iske qatysty kúdikti ekendigi belgili boldy. Onyń kámeletke tolmaǵanyn eskere otyryp, oǵan bultartpaý sharasy retinde úıqamaq qoldanylǵan. Alaıda, ol bul sharany buzyp, jasyrynǵan. Keıin sot sankııasy ózgertilip, qamaýǵa alý týraly sheshim qabyldandy», –delingen habarlamada.

Al jasóspirimniń urlaný deregi boıynsha tergeý júrip jatyr eken.

«Medıınalyq kýálandyrý qorytyndysy boıynsha dene jaraqattary anyqtalmaǵan, densaýlyq jaǵdaıy qanaǵattanarlyq. Urlaý deregine qatysty taraǵan aqparatqa kelsek, bul fakti boıynsha tergeý amaldary júrip jatyr. Onyń qorytyndysy boıynsha quqyqtyq baǵa beriledi», – delingen habarlamada.

Sondaı-aq polıııa zańda kórineý jalǵan aqparat taratqany úshin jaýapkershilik qarastyrylǵanyn málimdedi.

Al jasóspirimniń anasynyń aıtýynsha, ulyn beıtanys adamdar urlap áketip, birneshe apta boıy kúshpen ustaǵan.

“Ulyn joǵalttym” degen áıeldiń nusqasy qandaı?

Áıeldiń aıtýynsha, ulyn qoqys jáshikteriniń janyndaǵy turaqta turǵan jerinen úsh belgisiz er adam kúshtep kólikke otyrǵyzyp alyp ketken. Sosyn kilti men aqshasyn tartyp alǵan. Balany Shymkent qalasyna aparǵan. Anasynyń aıtýynsha, ol jerde Aıdos birneshe kún jertólede kúshtep ustalǵan jáne fızıkalyq zorlyq kórsetilgen.

Budan soń jasóspirimdi Túrkistan oblysyna aparypty. Sol jerde ol janarmaı quıý beketinde yńǵaıly sátti paıdalanyp, qashyp shyqqan. Balanyń aıtýynsha, ol jol boıynda kólik toqtatyp, túnde dalada qonýǵa májbúr bolǵan. Osylaısha ol anasymen qaıta qaýyshqan. Anasynyń aıtýynsha, Aıdos tabylǵan kezde dál úıden shyqqandaǵy kıimimen bolǵan. Ústinde fýtbolka, shorty jáne qara kók aıaq kıimi bolǵan. Áıel balasynyń psıhologııalyq jaǵdaıy aýyr ekenin aıtty. Sondaı-aq ulyn polıııanyń kómeginsiz tapqanyn jetkizdi.

Degenmen ol keıinnen jaǵdaıdy baıandaıtyn jazbasyn jeliden óshirip tastady. Oqıǵanyń tolyq mán-jaıyn bilý úshin ózine habarlasqan edik, alaıda keıin baılanysqa shyǵatynyn aıtty.