Алматының Әл-Фараби даңғылында болған жол апатына байланысты Ішкі істер министрі Ержан Сәденов бірнеше полиция басшысының жазаланғанын хабарлады. Министрдің тапсырмасымен Өзіндік қауіпсіздік департаменті, Әкімшілік полиция комитеті және Жеке құраммен жұмыс департаментінің қызметкерлері Алматыға жіберіліп, жан-жақты тексеріс жүргізілуде.
Қылмыстық іс полиция департаменті басшыларының біріне тиесілі көліктің жүргізушісіне қозғалды. Сот санкциясымен күдікті уақытша ұстау изоляторына қамалды. ІІМ өкілі Шыңғыс Әлекешевтің мәліметінше, жүргізуші апат кезінде жеңіл дәрежеде мас болған.
Қызметтік тексеріс барысында жол қауіпсіздігіне жауапты бірнеше лауазымды тұлға лауазымынан босатылды: Алматы қалалық Полиция департаменті бастығының орынбасарлары, Әкімшілік полиция және Қоғамдық қауіпсіздік басқармаларының басшылары. Сонымен қатар, мемлекеттік нөмірлердің заңсыз берілуі мүмкін деген күдікпен Өзіндік қауіпсіздік департаменті қылмыстық іс қозғады.
ІІМ барлық мән-жайларды егжей-тегжейлі тексеретінін және заң бұзғандар толық жауапқа тартылатынын ескертті.
Дереккөз: Informburo.kz
